Bugun futbol. "Metallurg" - "Neftchi"

"Metallurg"dan farqli o'laroq "Neftchi"ning turnir jadvalidagi holatiga havas qilib bo'lmaydi. Bu anchadan beri aytib kelinayotgan gap. Bekobodliklar 24 ochko bilan 6-o'rinda borishmoqda. "Neftchi" esa 8 ochko to'plagan holda oxirgi o'rinni egallab turibdi.

"Neftchi"ning mavsum boshidan beri hali g'alaba qozonmagani ham eskirgan gap bo'lib qoldi. CHunki jamoa 18ta o'yinning 10tasida mag'lub bo'lib 8 bor durang qayd etgan. To'plar nisbati 8-25. 

"Neftchi" har turda g'alaba qozonishga astoydil harakat qilyapti. Masalan, safarda AGMK va "Bunyodkor" bilan kechgan o'yinlarda yaxshi futbol namoyish etdi. Ayniqsa Olmaliqdagi o'yin "Neftchi" ishtirokidagi eng chiroyli bahslardan biri bo'ldi. Lekin ozgina omad etishmadi.

Bilasizmi? "Neftchi" oxirgi to'rtta turning uchtasida durang qayd etdi. Bu jamoa hozir shunchaki futbol o'ynayapti. Balki g'alabali onlar ham kelib qolar.

"Metallurg" bugun o'z maydonida 10-uchrashuvini o'tkazadi. Avvalgi 9ta bellashuvning to'rttasida bekobodliklar zafar quchishgan. Uchta o'yin durang bilan yakun topgan bo'lsa, ikki bor mag'lubiyat qayd etgan. To'plar nisbati 10-10. "Metallurg" uydagi o'yinlarda 15 ochko jamg'argan.

Fakt: "Metallurg" o'z uyidagi oxirgi ikki o'yinda g'alaba qozona olmadi. Jamoa "Nasaf" va "Bunyodkor" bilan durang o'ynadi. So'nggi bor Bekobodda "Lokomotiv" 2:0 hisobida mag'lub etilgan.