Bobur Zuhriddinov: "Bugun g'alaba qozonishimiz shart edi"

O'yin haqida

- "Mashal" muxlislarini va jamoamizning har bir azosini bugungi g'alaba bilan tabriklaymiz. Bugun yutishimiz kerak edi, buni 3 marta takrorladim. Yigitlar aynan shuni his qilgan xolda maydonga tushishgandi. Biz ortda qolgan 2 ta turda omadsizlik tufayli mag'lub bo'lgandik. Bugungi o'yindagi mag'lubiyat kechirilmas xatoga aylanardi. Yigitlarga rahmat, biz g'alaba qozonishni uddaladik. "G'ijduvon" jamoasining kuchli va kuchsiz tomonlarini o'rganib chiqdik va mos ravishda tayyorgarlik ko'rgandik.

- Xudoyorxon Sagdullaev zaxiradan tushirilmoqda. Uning o'yinni asosiy tarkibda boshlamayotganiga sabab nima?

- Sagdullaev juda iqtidorli futbolchi. Har bir raqibga qarshi alohida yondashuv bilan tayyorgarlik olib boriladi. Bu rejamizda bor edi va reja ish berdi. 

- Bobur aka, avvalo tug'ilgan kuningiz bilan tabriklaymiz. Savolim shunday, o'yin qaydnomasida jamoa bosh murabbiyi sifatida Dilyaver Vaniev ko'rsatilgan. Biroq, maydon chetida futbolchilarga klub rasmiysi Denis Vasilev ko'rsatma berib bordi. Bu nimani anglatadi?

- Yo'q, jamoamiz bosh murabbiyi Dilyaver Vaniev hisoblanadi. Bizda murabbiylar tarkibi bor. Murabbiylar tarkibiga siz ko'rgan Denis Vasilev ham qo'shiladi. SHuningdek, men ham murabbiylar shtabi bilan Dilyaver Vanievga yordam beramiz. O'yinda hayajonli vaziyatlar bo'ladi. Vaziyatlar tahlilida murabbiylar navbati bilan ko'rsatma berishi mumkin, bu tabiiy hol.

- Sergey Petrovning o'yini haqida fikrlaringiz?

- Petrovda ruhiyat yaxshi. Jamoa bilan tez kirishib keta oldi. Iqtidorli futbolchi, yuzaga kelgan imkoniyatdan unumli foydalanadi. Bugun ham u gol urib jamoamiz g'alabasiga o'z hissasini qo'shdi.

- "Mashal" mavsum startini o'tgan yilgidan yomon boshladi. Bu tarkib o'zgarishi bilan bog'liqmi?

- Albatta, shunday. Jamoamiz tarkibi 70 foizga o'zgarib ketdi. Yoshlar keldi, legionerlar keldi, bunday xolatda natija birdan yaxshi bo'lmaydi. Maqsadimiz faqat bitta - Superliga. Biz bu maqsad yo'lidan o'yindan-o'yinga shakllanib, kuchayib boramiz.