Baxtiyor Ashurmatov: “Birinchi navbatda futbolchilar bilan to'liq hisob-kitob qilishimiz kerak”

Endilikda natijalarni  yaxshilash maqsad qilinmoqda. Mavsum yakuniga etgach, Navbahorning bir qator futbolchilarini boshqa klublar safidan o'rin olishi mumkinligi haqidagi mish-mishlar paydo bo'lgandi. Lekin, hozircha hech bir futbolchi jamoadan ketish haqida rahbariyatga murojaat qilmadi. Bundan tashqari bosh murabbiy Baxtiyor Ashurmatovni Navbahordan ketishi haqidagi gap-so'zlar ham hech qanday asosga ega emas.

Milliy terma jamoamiz murabbiylar shtabida ham ish yuritayotgan Ashurmatov Navbahordagi faoliyatini ham davom ettirish niyatida. Xullas klub rahbariyati va murabbiylar shtabining maqsadlari jiddiy. Buning uchun jamoaga muxlislar va viloyat rahbarlarining ishonchi zarurligini bosh murabbiy Baxtiyor Ashurmatov ham takidlab o'tdi. Quyida bosh murabbiyning fikrlari bilan tanishish imkoniga bo'lasiz:

“Hozir ko'pchilik muxlislarimizni jamoaning kelajagi, yani yangi yil rejalarini qanday bo'lishi qiziqtirayotganligi aniq. SHaxsan o'zimni “Navbahor” jamoasidan ketish niyatim yo'q. Murabbiy sifatida yuqoriroq o'rinlar uchun kurashadigan jamoa tuzishni xohlayman. Bunday jamoani shakllantirish oson bo'lmasligini barcha yaxshi biladi. SHunday bo'lsada, namanganlik ishqibozlarni quvontirishni maqsad qilganmiz. Buning uchun menga birinchi navbatda muxlislarimizning va viloyat rahbarlarining ishonchi kerak. SHu bilan birgalikda rahbarlarimiz keyingi yil byudjetini tasdiqlab berishsa, shunga qarab jamoani kuchaytirish lozim bo'ladi. Hozircha yakuniga etgan mavsumda jamoa sharafini himoya qilgan futbolchilardan hech biri “Navbahor”dan ketgani yo'q. Ular ham vaziyatni oydinlashishini kutishmoqda.

Birinchi navbatda futbolchilar bilan to'liq hisob-kitob qilishimiz kerak. Aynan shu orqali asosiy tarkib o'yinchilarini saqlab qolish imkoniga ega bo'lamiz. Jamoa yangi mavsumga tayyorgarlik ko'rish uchun 15 dekabr kuni Namanganda yig'iladi. Mashg'ulotlar boshlanishi arafasida klub rahbarlari bilan gaplashib olaman. Birinchi o'rinda avtobus, baza va mashg'ulot o'tkazish uchun maydon masalasini hal qilishimiz talab etiladi. SHaroitlar yaratilsa, jamoa yuqori o'rinlar uchun kurashishga tayyor bo'ladi. CHunki namanganlik muxlislar “Navbahor”ni yuqori pog'onalarda yurishini xohlashadi va ular bunga munosibdirlar.

Fursatdan foydalanib, bizni qo'llab-quvvatlayotgan ishqibozlarimizga alangali salomimni yo'llab qolaman”.
Jamoamiz mavsumga tayyorgarlikning dastlabki bosqichini 15 dekabr kuni Namanganda boshlaydi. Jamoa azolari bir necha kun davomida mashg'ulot o'tkazishgach, yangi yil bayrami munosabati bilan qisqa muddatlik tatilga chiqishadi. Yangi yilning dastlabki kunlaridan yana mashg'ulotlar davom ettiriladi.