Aziz Ibragimov: "Gollarimni dadamga va muxlislarimga bag'ishlayman"

- Tabriklar uchun rahmat. Avvalo bizni tinmay qo'llab-quvvatlab turgan ajoyib muxlislarimizga katta rahmat. Mana shunday shiddatli va murosasiz bahsda bugun Samarqand ahlini xursand qila olganimizdan juda baxtiyormiz.

- Gol urgach, futbolkadagi 54 raqami orqali kimni tabrikladingiz?

- Bu dadamga bag'ishlangandi. Ertaga 17 may kuni dadajonim 54 yoshni qarshi oladilar. SHu bois ushbu golimni dadam va qolgan yaqinlarimga bag'ishlagandim. Umuman olganda ikki golimni otam va muxlislarga bag'ishlayman. Ishqibozlar jamoamizning kuchiga kuch qo'shdilar.

- Mavsumdagi 3-golingizni kiritdingiz. Dinamodagi faoliyatingizdan qoniqayapsizmi?

- Hozircha qoniqayapman deya olaman. Imkonqadar muxlislarni xursand etishga harakat qilayapmiz. Umuman olganda, men qaerda to'p surmagan bo'lsam maksimal kuchimni sarf etib faoliyatimdan qoniqqanman.

- Sizni hujumkor yarimhimoyachi sifatida bilardik. Samarqandda esa hujumchi sifatida to'p surayapsiz. Bu sizga maqulmi?

- Avvalambor, bosh murabbiyimiz meni qaysi poziciyaga qo'ysa o'sha erda to'p suraveraman. Hozir hujumda jamoamga foydam ko'proq tegayapti. SHunday ekan, hujumchi sifatida to'p surish menga maqul.

- Oldinda Dinamoni og'ir o'yinlar kutib turibdi. Bunyodkor, Paxtakor va Nasafga qarshi. Imkoniyatlar borasida fikrlaringiz?

- Biz har bir o'yinda ochkolar uchun kurashamiz. Bu futbol – oldindan hech narsa deb bo'lmaydi. Ayniqsa bu yil qator kutilmagan natijalarga guvoh bo'lib turibmiz. Misol uchun, Nasafning Metallurgga mag'lub bo'lishini yoki bugungi raqibimiz So'g'diyonaning Bunyodkorni mag'lub etishini hech kim kutmagandi. Demakki, bizda ham g'alaba uchun imkoniyatlar bo'ladi.

Usmon IBODOV yozib oldi.