Aleksandr Kleckov: “O'zbekistonga qaytishni maqul ko'rdim”

Kuni-kecha, aniqrog'i, 15 yanvar kuni futbolchi Toshkentga qaytib keldi. Malum bo'lishicha, Kleckov yangi mavsumda faoliyatini “BEK Tero”da olib bormaydi. Nega degan savolga himoyachining o'zi aniqlik kiritib berdi:

- Tailand premer-ligasida har bir klub o'z tarkibida jami 7 nafar legionerni ro'yxatdan o'tkazishi mumkin. Uchrashuv qaydnomasiga esa har bir jamoa 5 nafar xorijlik o'yinchini kiritish imkoniga ega. Maydonda esa bir vaqtning o'zida 4 nafar chet ellik “3+1” tizimida o'ynashi mumkin. Yani bu to'rt futbolchidan kamida bittasi osiyolik bo'lishi shart. Bugungi kunga kelib “BEK Tero Sasana” safida 7 nafar xorijlik o'yinchi mavjud edi: mendan tashqari, yaponiyalik ikki o'yinchi, Argentina, Kongo DR, Gvadelupa (Karib havzasi mamlakati) hamda Sudan vakillari.

Klub rahbariyati biz osiyoliklar oldiga shart qo'ydi. Har o'yinda osiyoliklardan maydonda ular faqat bir kishini o'ynatishmoqchi ekan. O'yin amaliyotimiz kam bo'lishini aytishdi. Bizda kubok musobaqalari bir nechta – Tailand futbol associaciyasi kubogi, Liga kubogi, Qirol kubogi. Kimda o'yin amaliyoti kam bo'lsa, o'shalardan kubok bellashuvlarida foydalanamiz, deyishdi.

Endi o'zingiz ham o'ylab ko'ring. Kuboklar bir nechta bo'lsa ham, baribir kubok bahslaridagi o'yinlar soni oz bo'ladi. O'zi usiz ham yarim yil o'yin amaliyotiga ega bo'lmadim. Men yashil maydonda bo'lishni hozir ich-ichimdan rosa istayapman. O'yinga rosa chanqoqman. Eng birinchi navbatda men shu uchun ham Tailandda bunday tebranishda – bir o'ynab, bir o'ynamay - faoliyat olib borishni maqul ko'rmadim va Toshkentga qaytishga ahd qildim. O'ylaymanki, men o'zim uchun to'g'ri qaror qabul qildim.