"Al Ahli" ustozi: "Ultras" bizga hech qanday bosim o'tkazmaydi. Bunday muxlislar ko'z o'ngida futbol o'ynash yoqimli"

"Barchaga xayrli kech. Ertaga yaxshi o'yin bo'ladi deb o'ylayman va biz ochkolarni qo'lga kiritishga umidvormiz. Oson o'yin bo'lmasligi aniq. "Andijon" himoyaviy jihatdan yaxshi shakllangan jamoa. Ularga qarshi o'ynash qiyin va himoyasini yorib o'tish qiyin. Umid qilamanki, safar uchrashuvi uchun bosib o'tgan yo'limiz futbolchilarning jismoniy holatiga salbiy tasir qilmaydi va biz yaxshi natija qayd eta olamiz," - dedi Igor Bishan matbuot anjumanida.

"Bosh murabbiyimiz aytib o'tgandek jiddiy sinov kutib turibdi, lekin ko'p mehnat qildik va yaxshi tayyorgarlik ko'rdik. Andijonda g'alaba uchun keldik. O'zimizga bo'lgan ishonch ham etarlicha. Ertaga maydonda 100% borimizni ko'rsatamiz degan umiddaman," - dedi Erik Ekspozito.

- "Andijon" haqida qanday fikrdasiz?

- Birinchi navbatda tashkiliy ishlar bilan shug'ullanayotgan insonlarga rahmat aytaman. Biz aeroportga qo'nganimizdan buyon bizni iliq kutib olish va mehmondorchilik ko'rsatishdi. Bu mehmondo'stlik uchun rahmat aytaman. Ishonchim komilki, "Andijon" yaxshi jamoa ayniqsa himoyada juda tartibli o'yin namoyish etadi. "Andijon" o'z uyida kam mag'lub bo'ladi. Jamoaning "Arqadag'" va mahalliy chempionatidagi so'nggi o'yinlarini ko'rib chiqdik. Ertaga to'p ko'proq bizda bo'lsa kerak, raqibimiz ko'proq to'psiz harakat qilish va o'z o'yinini himoyadan qurishga intiladigan jamoadek. Oson bahs bo'lmaydi. Biz o'z darajamizni namoyish etishimiz kerak va faqat shundagina o'zimiz istayotgan natijaga erisha olamiz. 

- Jamoa Andijonga qanday holatda etib keldi? Tarkibda yo'qotishlar bormi?

- Jarohatlar va futbolchilarimiz holati haqida gapiradigan bo'lsam, biz so'nggi ikki hafta davomida zich taqvimda o'ynadik va jiddiy raqiblar bilan to'qnash keldik. Aytarli jarohatlar kuzatilmadi. Ikki nafar futbolchimizda kichik jarohatlar bor va ular ertaga maydonda bo'lish bo'lmasligi hali aniq emas. Umuman olganda, tarkibimiz jangovar.

- "Al Ahli" Qatar chempionatidagi so'nggi uchrashuvlarida hujumkor o'yin namoyish etdi. Ertaga ham jamoangiz hujumkor o'yin ko'rsatadimi?

- Biz katta o'zgarishlar qila olmasak kerak. Mahalliy ligadagi so'nggi o'yinlarimizni kuzatgan bo'lsangiz, biz o'zimizdan ham kuchliroq jamoalarga qarshi ko'proq to'pga egalik qilishga intildik. Ertaga ham to'p nazorati orqali o'yinni nazorat qilishga harakat qilamiz. "Andijon" qanday o'yin namoyish etishi ham muhim, raqib bizni himoyalanishga ham majbur qilishi mumkin. Ishonchim komilki, ertaga biz ko'proq to'pga egalik qilamiz. "Andijon"ning o'yin uslubi shunday.

- "Andijon"  muxlislari nafaqat O'zbekistonda balki Osiyoda ham o'z nomiga ega. Shuningdek, ertaga stadion to'lishi kutilmoqda. "Al Ahli" futbolchilari muxlislarning bosimiga qanchalik tayyor?

- Yo'q. "Ultras" bizga hech qanday bosim o'tkazmaydi. Bunday muxlislar ko'z o'ngida futbol o'ynash yoqimli. Bunday muxlislar haqiqiy futbolni his qilishga yordam beradi. Shaxsan men bunday o'yinlardan rohatlanaman.