Abdulla Abdullaev: “Raqobatdan cho'chiganimda AGMKga kelmasdim”

 Futbolchi olmaliqliklar bilan shartnoma imzoladi. SHundan so'ng u bilan suhbatlashib, o'zimizni qiziqtirgan savollarga javob oldik. 

- “Mirjalol aka Qosimovning taklifi bilan AGMK bilan kelishuvga erishdim. Klub men bilan anchadan beri muzokara o'tkazib kelayotgandi. SHu vaqtda men “Bunyodkor” rahbariyati bilan ham gaplashib olgandim. CHunki yashirincha muzokara o'tkazishni istamagandik. Barchasi yaxshi kechganidan so'ng olmaliqliklar bilan ikki yillik shartnoma imzoladim",- deydi Abdulla Abdullaev.

AGMKdagi raqobat haqida

- Albatta, raqobat bor joyda doimo o'sish kuzatilgan. Bu jamoada ham kuchli raqobat borligini bilaman. Men bunga to'liq tayyorman. O'z ustimda ko'proq ishlashda davom etmoqchiman. Agarda AGMKdagi raqobatdan cho'chiganimda, bu klubga kelmagan bo'lardim. 

“Bunyodkor”ni tark etishi borasida

- Bilasizmi, “Bunyodkor”da ajoyib mavsumlarimni o'tkazganman. SHu darajaga kelishimga aynan ushbu jamoaning hissasi katta bo'ldi. Yoshligimdan tarbiyalagan klubim hisoblanadi. Albatta jamoani tark etish oson bo'lgani yo'q. Qiyin qarorlardan birini qabul qildim. Mening qarorimni to'g'ri tushunishgani uchun klubning rahbariyati, murabbiylari va boshqa xodimlariga o'z minnatdorchiligimni bildiraman. 

Boshqa jamoalardan taklif to'g'risida

- Yashirmayman, boshqa jamoalardan ham taklif bo'ldi. Biroq men hozir ularni nomlarini ayta olmayman. CHunki hurmatsizlik qilgan bo'laman. Lekin menga ishonch bildirib, o'z safiga chaqirgan jamoalarga rahmat. AGMKni tanlashimda dadam bilan maslahat qilgan holda shunday qarorga keldim. 

Yangi mavsum borasida

- AGMK bilan shartnoma imzolashimdan avval jamoa bosh murabbiyi Mirjalol aka Qosimov bilan gaplashdim. Yangi mavsumda jamoa o'z oldiga yuqori maqsadlarni qo'ygan. Yani, mamlakat chempionligi uchun kurashmoqchimiz. SHu maqsadlarni amalga oshirish uchun oxirigacha harakat qilamiz. Bizni qiyin mavsum kutmoqda. Ishonamanki, qo'yilgan vazifani bajargan holda klub tarixini yozishni uddasidan chiqa olamiz.