8+3. To'y kuni, Mirjalol Qosimov va Rivaldo haqida - Kamoliddin Alimov

2022 yildagi ilk mehmonimiz tajribali jurnalist, Olamsport.com sayti muharriri, ustozimiz Kamoliddin Alimov bilan suhbatlashdik. Unga futbolga oid 8, futboldan tashqari 3ta savol bilan murojaat qildik.

- Siz o'yinlarini bevosita kuzatgan eng kuchli futbolchi kim?

- Rivaldo va Mirjalol Qosimov. Braziliyalik futbol yulduzi 40 yoshgacha yaqinlashib qolganiga qaramay o'zidan yorqin taassurot qoldirgandi. To'purarlik mahoratini namoyish eta olgan edi. Insonni yoshlik shijoati, kuch tark etishi mumkin, lekin tajriba o'zi bilan birga qoladi. Asal aynimas, oltin zanglamas deyishadiku, shunchaki respekt! Mirjalol Qosimov esa shunchaki afsona.    

- Siz ko'rgan eng chiroyli gol qaysi?

- Eng yaxshilari hali oldinda bo'lsa kerak. Lekin hozir hayolimga zangori ekranda ko'rganim Marko van Bastenning goli keldi. 

- Futbol olamida boshqalardan mutlaq ajralib turadigan shaxs kim?

- Bizning zamonamizda Messi va Ronaldu. Ha, ularning ham yulduzli onlari yakuni sari yaqinlashyapti. Har bir davrning boshqalardan ajralib turadigan o'z "shaxslari" bo'ladi. Ular haqida hamma gapiradi. O'tgan asrda Pele va Maradona ana shunday maqom va mavqeyda bo'lgandi. Afsuski, o'zbek futbolida bu tipdagi shaxsni shu kunlarda ko'rmayapman. Rahmatli Mirabror Usmonov salobatli, xarakterli inson edilar. 

- O'zbekiston terma jamoasini boshqargan eng kuchli murabbiy kim?

- Terma jamoada ishlaganlar orasida yaqqol ajralib turadigan murabbiy yo'q. Aks holda biz hamon mundial orzusi bilan yashamayotgan bo'lardik. Mirjalol Qosimov bilan jahon chempionatiga yaqin kelgandik. Bitta gol etmay qolgani bizni orzular ro'yobidan mahrum qilgandi. SHu savolga bir murabbiyning ism-sharifini ayting desangiz, bu - Qosimov! Lekin bu terma jamoada ishlagan murabbiylarning salohiyatidan kelib chiqib aytilgan nomzod, bildirilgan fikr emas.    

- O'zbek futbolidagi eng omadsiz shaxs kim?

- Qay biridan boshlay? Omadsiz shaxslar ko'p. Futbolga aloqador bo'lmasa-da, lekin shu sohada ishlab yurganlar yo'q emas. O'zi boshqa sohalarda ham ahvol shu. Ayniqsa, rahbarlik tizimida. 

- Sizningcha, bugun o'zbek futbolining qaysi jihatlari tanqidga loyiq?

- Haligacha piramida ko'rinishidagi quyidan yuqoriga harakatlanuvchi milliy rivojlanish tizimimiz yo'q. Bolalar futboliga etibor hali maqtanadigan darajada emas. Korrupciya ildiz otib yotibdi. Maydonlar sifati haqida 25 yil oldin bildirilgan fikrlar hozir ham o'z kuchida. Prezident tomonidan millionlar o'yinini rivojlantirish bo'yicha qabul qilingan farmon va qarorlar futbolchalik hech bir sohada yo'q. Eng ko'pi futbolda, ammo natija...   

- Siz bevosita stadiondan kuzatgan eng oxirgi o'yin?

- To'g'risi, hozir aniq eslay olmadim. 2021 yil Olimpiada yili bo'lgani uchun asosiy etibor sportga qaratildi. Futboldan biroz bo'lsada uzoqlashib qolganimni tan olaman. Lekin stadiondan kuzatgan o'yinlarim bo'ldi. Boshqa tomondan avvalgi dahshatli derbilarni hozir ko'rmayapmiz.  

- O'zingiz o'yinlarini kuzatgan futbolchilar orasidan ramziy jamoa tuzib bering.

- Haligacha quvonib eslaydiganimiz 12-Osiyo o'yinlaridagi tarixiy g'alabaga hissa qo'shgan futbolchilar:

Yuriy SHeykin - Andrey Fyodorov, Fevzi Davletov, Farhod Magometov, Ulug'bek Ro'zimov - Ilhom SHaripov, Sergey Lebedov, Aleksandr Tixonov, Mirjalol Qosimov - Azamat Abduraimov, Igor SHkvirin.

- Hayotdagi kumiringiz kim?

- Ota-onam!

- O'zingizga yoqmagan tarafingiz qaysilar? Kamchiliklaringiz...

- Eng katta kamchiligim - belgilangan uchrashuvga kech qolishim. To'g'ri, uxlab qolganim uchun kechikmayman. Lekin bu o'zimni oqlash uchun bahona bo'la olmaydi. 2022 yilda shu kamchilikni bartaraf etishga harakat qilaman. Keyin ko'nglim bo'shligi ko'pincha pand bergan.  

- Hayotingizning burilish nuqtasi sifatida qaysi voqeani eslaysiz?

- Bunday nuqtalar ko'p bo'lgan. Keling, uylanish, yani to'yim bo'lgan kun deylik. CHunki, o'sha ondan boshlab hayotga qarashim o'zgargan. Ko'p narsalarni o'ylay boshlaganman. Masuliyat oshgan.