Mirjalol Qosimov: "Agar imkoniyatim bo'lganida futbolchilar miyasiga kirib ikkinchi taymga nima xayolda chiqishganini bilgan bo'lardim"

- O'yin haqida fikringiz?

- Ajoyib o'yin guvohi bo'ldik. Birinchi bo'limdagi harakatlarimiz orqali yigitlarga hech qanday etirozim yo'q. Tanaffusdan keyin ikkinchi taymda qandaydir o'n daqiqa ichida ikkita to'p o'tkazib yubordik. O'ylashimcha, bu ruhiyat bilan bog'liq. Agar imkoniyatim bo'lganida futbolchilarimiz miyasiga kirib ikkinchi taymga nima xayolda chiqishganini bilgan bo'lardim. O'yinni yanada kuchaytirishni maqsad qilgandik. Afsuski, yutqazib qo'ydik. Penalti ham o'z xatomiz tufayli yuzaga keldi. Oxirgi golda esa darvozabonimiz qutqarishi kerak edi. Raqib o'yinchisi penaltini mahorat bilan amalga oshirdi. Oxirigacha kurashib hisobni 3:3 qila oldik, ammo yana ruhiyat sabab gol o'tkazib yubordik. Bugungi g'alaba bilan "Sho'rtan" jamoasini tabriklayman. Bugun kuchli xohish g'alaba qozondi.

- "Sho'rtan" turnir jadvalida oxirgi o'rinda boryapti. Birinchi davrada jamoalarning o'zaro bahsi 0:0 hisobida yakun topgandi. "Sho'rtan" OKMK uchun noqulay raqibmi yoki muammo OKMKning o'zidami?

- O'zi hammasi o'sha 0:0dan keyin boshlangandi. Lekin hamma ayb o'zimizda. "Sho'rtan"ni biz uchun noqulay raqib demagan bo'lardim. Futbolni aldab bo'lmaydi. Futbolchilar o'sishi uchun oxirigacha o'ynashlari kerak. Maydonda raqib ajratish yaxshi emas. Yana qaytarib aytaman, bugun muxlislar ajoyib o'yin guvohi bo'lishdi.

- OKMKning oxirgi beshta o'yinida bir durang va to'rt mag'lubiyat kuzatildi. Bu charchoq bilan bog'liqmi?

- Charchoqning bunga sira aloqasi yo'q. Oddiy vaziyatlarda xatolarga yo'l qo'yyapmiz, raqiblar esa kechirmayapti. Agar qiyin vaziyatda gol o'tkazib yuborsak buni juda yaxshi tushunaman. Ammo oddiy holatdagi xatolar haqida nima deyish mumkin.

- "Sho'rtan" ikkinchi taymda boshqacha o'ynadi, tezkor ikkita gol urib oldi. Shundan so'ng rejangizda o'zgarish yuzaga keldimi?

- 1:3 hisobida ortda borayotganimizda ham sinib qolmadik. Natijani tenglashtira oldik, ammo oxirgi gol standartdan keyin kiritildi. Futbolchimiz to'pni chiqarib yuborishga urindi, biroq o'xshamadi.