— Фикрим қандай бўлиши мумкин? Биз 1:0 ҳисобида ютқазаётган эдик. Шунинг учун рақибнинг қизил карточка олгани биз учун омадли бўлди, деб ўйлайман. Улар ўн киши бўлиб қолишгач, албатта, бизга осонроқ бўлди. Йигитларга ғалаба учун миннатдорчилик билдириш керак, аммо бу бизнинг энг яхши ўйинимиз бўлмади. Лекин, уч очко — уч очко. Бугун омад биз томонда бўлди. Энди жамоага келгуси ўйинларда ҳам омад тилаймиз. ФИФА кунлари боис танаффус бўлади. Қолган учта учрашувга тайёргарлик кўришимиз керак. Бу йилги мавсум бироз тушунарсиз кечди. Энди бор эътиборимизни тайёргарликка қаратамиз.
— Бу жамоанинг кетма-кет иккинчи ғалабаси. Мавсум якунидаги бу натижани ижобий ҳолат сифатида баҳолаш мумкинми?
— Сафарда иккита ўйинда ғалаба қозонганимиз қувонарли. Ундан олдинги тўртта учрашувда кўп очко йўқотдик. Балки ўша ўйинларда бугунгидан ҳам яхшироқ ҳаракат қилгандирмиз, аммо, афсуски, мағлуб бўлдик. Бугун эса кўриб турибсиз, футбол шундай ўйин. Унчалик ишончли кўринмаган бўлсак-да, ғалаба қозондик. Шунинг учун ҳозир бирор нарса дейиш қийин. Бу йил шундай кечди. Яна бир жиҳатга эътибор қаратмоқчиман: бугун қанча сариқ карточка олганимизни кўрдингиз. Ҳамма футболчилар карточка олди, мен ҳам, назаримда, жами 11 та бўлди. Буни тушуниш қийин.
— Тез орада ФИФА кунлари бошланади. "Динамо" футболчиларидан бирортаси Ўзбекистон миллий терма жамоасидан чақирув олдими?
— Йўқ, ҳозирча ҳеч ким олмади. Бугун охирги тур бўлгани учун чақирувлар ҳали юборилмаган бўлиши мумкин. Бу ҳақда аниқ маълумотим йўқ.
— Бугун гол урган Расул Йўлдошевнинг ўйини ҳақида фикрингиз қандай?
— Энг муҳими, у гол урди. Буни алоҳида таъкидлаш керак. Аммо у бугун тўртинчи сариқ карточкасини олди ва шу сабабли кейинги учрашувни ўтказиб юборади. Умуман, жамоа кўпчилик бўлиб ўйнаган ҳолда шунча сариқ карточка олганини қаерда кўргансиз? Гўёки биз доим ҳимояланаётгандек ва кўп қоидабузарлик қилаётгандек кўринади. Бу ҳолатни қандай изоҳлашни билмайман.
— Бугун Анваржон Хожимирзааев ўзининг 12-голини урди. Бу унинг фаолиятидаги энг яхши натижа. Унинг ўйини ҳақида қандай фикрдасиз?
— Бугун у энг зўр ўйинини ўтказди, дея олмайман. Аммо рақибнинг қизил карточка олишига сабаб бўлган вазиятдаги ҳаракати ва пенальтидан гол ургани яхши. Шу билан бирга, у бундан ҳам яхшироқ ўйнай олишига ишончим комил.
— Умуман, бутун мавсум давомидаги ўйини ҳақида нима дейсиз?
— Албатта, агар у жароҳат олмаганида, ҳозиргача янада кўпроқ гол урган бўларди, деб ўйлайман. У айнан энг яхши формасига кирган пайтда эди. Унинг ўйинини кузатиш ёқимли бўлган. Афсуски, жароҳат футболчини деярли бир ойга сафдан чиқарди. Бу жуда қийин бўлди.
— Эдем Сейтвелиев бугун учинчи ўйинини ўтказди. Асосий таркибда ҳам ёмон кўринмаяпти. Энди уни асосий таркиб футболчиси деб ҳисоблаш мумкинми?
— Албатта, йигит ҳаракат қиляпти. Бу қувонарли. Худо хоҳласа, у янада ўсиши ва ривожланишига умид қиламиз.
— Энди ФИФА кунлари муносабати билан футболчиларга дам берилади. Навбатдаги ўйингача қандай режалар бор?
— Жамоага беш кунлик дам берамиз, шундан кейин тайёргарликни бошлаймиз. Жиззах жамоаси билан ўртоқлик учрашуви ўтказишга келишиб олдик. 15 ноябрда Самарқандда ўйнаймиз. Шундан кейин "Бунёдкор"га қарши учрашувга тайёргарлик кўрамиз.
