Футболчининг айтишича, 2022 йилги жаҳон чемпионати саралаш босқичида Ўзбекистон миллий терма жамоасининг ўша пайтдаги бош мураббийи Вадим Абрамов у билан боғланган ва жамоага жалб қилиш ниятини билдирган.
"2022 йилги жаҳон чемпионати саралаш ўйинлари вақтида менга таклиф бўлган! Ўшанда, 2021 йилда саралаш мусобақаси эски тизимда ўтказиларди. Жамоалар аввал биринчи гуруҳ босқичидан ўтиши, кейин эса навбатдаги босқичда катта гуруҳга жамланиши керак эди.
Ўша пайтдаги бош мураббий Абрамов мен билан алоқага чиққанди. Биз келишиб олгандик. У Ўзбекистон биринчи гуруҳ босқичидан ўтса, кейинги босқичда жамоага ёрдам беришимни хоҳлаётганини айтганди.
Мен ҳам рози эдим, албатта, бундан хурсанд бўлгандим. Паспортим тайёр эди, ҳамма нарса ҳал қилинганди. Аммо улар гуруҳдан чиқа олишмади!
Ўша ўйиндан кейин на ўртоқлик учрашувлари, на саралаш баҳслари бўлди. Деярли бир йил давомида терма жамоа ўйин ўтказмади. Мен эса ўша пайтда 33–34 ёшда эдим. Шу билан бу масала ёпилди. Бу имконият амалга ошмаганидан жуда афсусланганман", – деди Черан.
Эслатиб ўтамиз, Ўзбекистон миллий терма жамоаси 2022 йилги жаҳон чемпионати саралашининг иккинчи босқичида Саудия Арабистонидан кейин гуруҳда иккинчи ўринни эгаллаган ва ҳал қилувчи босқичга йўлланма ололмаган эди.
