Манбанинг хабар беришича, футболчи Threads ижтимоий тармоғи орқали мурожаат йўллаб, ўз муаммосига жамоатчилик эътиборини қаратишни сўраган.
Ўразғуловнинг айтишича, у бир йилдан кўпроқ вақт аввал Тошкентдан Қозоғистонга кўчиб ўтган. Ҳозирда "Арис" клуби билан машғулотларда қатнашаётган бўлса-да, фуқаролик масаласи ҳал этилмагани туфайли расмий учрашувларда майдонга туша олмаяпти.
"Мен профессионал футболчиман. Ҳозирда 'Арис' жамоаси билан машғулот ўтказяпман, аммо Қозоғистон фуқаролигига эга бўлмаганим учун чемпионатда ўйнай олмаяпман.
Фуқаролик олиш учун кўп марта ҳаракат қилдим, бироқ ҳеч қандай натижа бўлмади. Сизлардан мени қўллаб-қувватлашингизни сўрайман", – деб ёзган Ўразғулов.
Футболчи ўзини Тошкентда туғилиб ўсган қозоқ сифатида таништирган ва ижтимоий тармоқ фойдаланувчиларидан ушбу вазиятга эътибор қаратишни сўраган.
Ҳозирча Ўразғуловнинг фуқаролик олиш бўйича мурожаатлари нима сабабдан натижасиз қолаётгани маълум эмас.