Парагвай - Франция жамоалари баҳсини бошқарган ҳамюртимиз ўйиндан сўнг танқидлар ёмғири остида қолди. Биз эса бу борада "Алё, реф" телеграм канали муаллифи, Championat.asia сайти ҳакамлар бўйича эксперти, "Алё, реф!" канали эгаси Анатолий Синяев Ильгиз Танташевнинг кечаги ўйинини таҳлил қилди.
"Умумий манзарани олганда, ўйин омадсиз чиқди. Тўғри, рефери елкама-елка курашларга деярли хуштак чалмади. Парагвайликлар бундан унумли фойдаланиб, ҳаддидан ошиб кетишди. Танташевнинг юмшоқлиги эвазига рақиб вакиллари майдонда жуда кўп эркинликка эга бўлишди. Жанубий америкалик футболчи ҳатто дарвозабоннинг тўпни ўйинга киритишига тўсқинлик қилди. Бундай қўполликлар эса бош ҳакамнинг нигоҳидан четда қолди, оқибатда бир нечта фоллар белгиланмади.
Ҳатто қизил карточкага лойиқ ҳолатлар учради. Океан орти вакиллари ўта тажовузкор ўйнай бошлашди. Эпизодларни алоҳида таҳлил қилсак, Парагвайнинг 3 нафар ўйинчисини майдондан четлатиш мумкин эди.
Матиас Галарса Мбаппенинг кўкрагига яққол зарба берди. Ўша вазиятда ҳеч бўлмаса сариқ кўрсатилиши керак эди. Агар ушбу дақиқадан бошлаб ўзбекистонлик ҳакам назоратни қўлига олганида, рақиблар буёғига ўйлаб ҳаракат қиларди. Кейинги 2 эҳтимолий четлатишга лойиқ жараён ўзбекистонлик реферининг диққат марказидан четда қолди. Танташев анча қаттиққўлроқ ёндашиши лозим эди.
Энг ҳал қилувчи палла жарима майдончаси ичида Дуэга нисбатан ишлатилган қўполлик бўлди. Хайриятки, эпизодга ВАР аралашди, кейин Мбаппе пенальтидан гол урди. Бу ерда яққол қоидабузарлик бор эди, бироқ у бундай фолларни кўпинча эътиборсиз қолдирди.
Бу ўзбекистонлик ҳакамнинг куни эмасди. У учрашувга нотўғри тактик ёндашувда тушган ва бу умумий манзарага салбий таъсир қилди. Одатда, бундай ўйинлардан кейин ҳакамлар навбатдаги баҳсларга тайинлов олмайди",- дейди Анатолий Синяев.
