“Мана учинчи ўйинки, ўйин сўнггида гол ўтказиб юборяпмиз. Аламли ҳолат, бу қандайдир шум қисматга ўхшайди. Фаолиятимда бундай ҳолат биринчи марта бўлиши. Жамоа билан юз бериши мумкин бўлган энг ёмон нарсалар содир бўлмоқда. Йигитларнинг меҳнати учун жуда ачиндим, улар бугун жуда катта иш миқдорда меҳнат қилишди. Тахминан 80-дақиқаларгача биз кўрмоқчи бўлган "Андижон"нинг прототипини, 2026-йилги мавсумда шаклланиши керак бўлган жамоани кўрдик. Жамоа агрессив, ҳужумкор футбол ўйнаши керак. Албатта, иккинчи бўлим бошида рақибни “енгиб” ўтишимиз керак эди. Кўрганимиздек, улар бизнинг ўйимизни тўхтатиш учун вақтни чўза бошлашди, симуляциялар кўпайиб кетди.
Афсуски, охиригача босим қила олмадик. Ўйин сўнггида бундай гол ўтказиб юбориш жуда аламли. Бурчак зарбасининг ўзи ҳам йўқ жойдан пайдо бўлди. Яна концентрацияни йўқотдик. "Қизилқум" билан ўйинда ҳам бурчак зарбаси пайтида концентрацияни йўқотган эдик.
Ўтган сафар "Насаф" билан ўйинда эса тезкор ҳужумда... Биз бу борада жуда кўп ишлаяпмиз, муҳокама қиляпмиз. Афсуски, ҳозирча концентрацияни биринчи дақиқадан охирги дақиқагача ушлаб туришнинг ечимини топа олмаяпмиз. Йигитлар ва мухлислар учун жуда афсусдаман. Вилоят раҳбариятининг ишончини оқлай олмаяпмиз.
Вазиятдан қандай чиқиш мумкин? Шубҳасиз, бу жамоа бундан ортиғига лойиқ. Ўйлайманки, вазиятни ўнглаш учун барча имкониятлар бор, ҳаммаси ўз қўлимизда. Раҳбарият билан гаплашамиз, бу вазиятдан қандай чиқиш ҳақида ўйлаб кўрамиз”, - деди Самвел Бабаян учрашув якунлангач.
- Остон Урунов билан боғлиқ ҳолат ҳақида гапириб ўтсангиз? У жамоага қачон қўшилади?
- Бугун улгура олмадик. Яқин кунларда, кейинги ўйингача вазият қандай ривожланишини кузатамиз. Футболчилар ҳам, Эрон клуби ҳам футболчининг бугун майдонда бўлиши учун деярли ҳамма ишни қилди. Маълум бир ташкилий тартиб-қоидалар бор, икки федерация ва ФИФА билан келишиш керак.
- Эрондаги клубнинг позицияси қандай? Қўйиб юборишга тайёрми?
- Клуб ён босмоқда ва Остоннинг мундиалга тайёрланиши кераклигини тушуниб турибди.
- Жамоа таркибидаги футболчиларнинг даражаси юқори. Лекин шунга қарамай ҳужумда имкониятлар яратилмаяпти. Бунга сабаб нимада?
- Тахминан 70-дақиқагача йигитлар ижросида агрессив, вертикал футбол кўрдингиз. Шундан сўнг биз ўйинни кучайтирмоқчи бўлдик. Мана учинчи марта ўйинни кучайтиришга ҳаракат қиляпмиз ва барча ўзгаришлар ўйинда ғалаба қозонишга қаратилган. Бизни дуранг қониқтирмайди, биз ўйинларда ютишни истаймиз. Афсуски, натижа бутунлай тескари бўлиб чиқяпти. "Насаф" билан ўйинда ҳам, "Қизилқум" билан ўйинда ҳам шундай бўлганди, бугун ҳам бор фикримиз мухлисларни хурсанд қилиш эди.
Аниқ айтиш мумкинки, Андижонда ҳамма ҳам босим остида ўйнай олмайди. Тушуняпсизми, ҳар ким ҳам босимга бардош бера олмайди. Бугун яққол кўринди: улар аввалги клубларида ўйнаган, голлар урган, аммо бу ерга келиб негадир "йўқолиб" қолишмоқда.
Балки вақт керакдир, балки қандайдир психологик жиҳатлари бордир, лекин очиғини айтганда, ҳозирча биз олган футболчиларнинг ҳаммасидан ҳам кўнглимиз тўлмаяпти. Биз уларнинг салоҳиятини биламиз, уларни чемпионатимизга мослашган, яхши ўйин кўрсатгани учун таркибга жалб қилганмиз. Бироқ ҳозирча буни кўрмаяпмиз. Бугун нимадир етишмади, балки жанговар руҳ етишмагандир. Бу ҳақда гаплашган эдик. Исмоналиев бугун майдонга тушди. Ҳаатолар бўлди, лекин у курашди, жамоанинг ҳужумдаги ҳаракати учун қўлидан келган ҳамма ишни қилди. Бизга айнан шундай “дух” керак. Балки мослашиш учун вақт керакдир, кўрамиз.
- Мавсум бошида ҳоким жамоа олдига чемпионлик вазифасини қўйганди. Олти турдан сўнг эса бор-йўғи олти очко тўпланди...
- Чемпионлик вазифасини қўйганмизми? Йўқ, чемпионлик ҳақида гап бўлмаган. Ҳозир чемпионлик учун “фундамент” тайёрлаш керак. Чемпион бўлиш учун кўп иш қилишимиз керак. Бунинг учун нима қилиш керак? Бизда пойдевор тайёрлаш тажрибаси бор. Лекин, афсуски, ҳозир бу ҳақда сўз юритилмаяпти. Ҳозирги вазифа — замонавий футбол ўйнайдиган ва ўз мухлисларини хурсанд қиладиган жамоа тузиш. Ҳозир олдимизда айнан шу вазифа турибди.
“Нефтчи”га ютқазганимизда биз "B" режасига ўта олмаганимиз учун ютқаздик. Агар Боаке гол урганида ёки биринчи бўлимда гол ўтказиб юбормаганимизда, балки ҳаммаси бошқача бўларди. Аммо, "B" режасига ўтиб, ҳужумга берилиб кетдик ва тезкор қарши ҳужумларни ўтказиб юбордик. "Насаф" ва "Қизилқум"га қарши ўйинларда бўлгани каби, бугун ҳам мағлубиятга лойиқ эмасдик.
Айнан шундай ўйинларни таҳлил қилиб, олдинга интиладиган жамоа шаклланса керак. Ўйин сифати борасида чемпионлик учун курашадиган жамоа бўлишимизга ҳали анча бор. Биринчи навбатда яхши жамоа тузиб олишимиз керак.
- Маҳаллий ўйинчилар Ғуломов, Азимов ва Комиловлар нега ўринбосарлар таркибига ўтказилди?
- Ким кучлироқ бўлса, ўша майдонга тушади. Қарор адолатли қабул қилинади. Биз учун фарқи йўқ, маҳаллий ёки легионер. Ким кучли бўлса, майдонга ўша тушади. Агар футболчи бугун таркибда ўйнашга ҳақли бўлса, демак, у меҳнати билан майдонга тушишга лойиқ бўлган. Биз маҳаллий ёки легионер деб ажратмаймиз. Биз бир жамоамиз.
- “Фундамент” бўлиши керак деб айтиб ўтдингиз. “Андижон”га келаётганда шу ҳақда ҳоким билан гаплашганмидингиз? Яхши жамоа қуриш бир неча мавсумлик иш...
- Бугун мағлуб бўлган бўлсак-да, “Андижон” намойиш этиши керак бўлган ўйин услубини кўрсата олдик. Бу ўйин учун уялишга ҳожат йўқ. Охирида яна концентрацияни йўқотдик, оддий вазиятда бурчак тўпи.
Инфратузилма ва келишувларимизга келсак, ростини айтиш керак, клуб фаолиятида ҳам кўп нарса ўзгарди. Клуб нафақат жамоалар орасида, балки ўзи ҳам етакчи бўлишга лойиқ. Бу борада ҳам жуда катта ишлар қилинмоқда, янги бош директор ҳам ишламоқда.
Эрондаги йигитларимизни рўйхатдан ўтказиш учун энг яқин келган клуб бизмиз. Нега? Чунки бу клубнинг иши. Ҳужжат алмашиш, музокаралар ва ҳоказо. Жумладан, менинг вазифам ҳам жараённинг олдинга силжишига ёрдам бериш. Аслида, бу ишларнинг ҳаммасини тезроқ қилиш керак, клуб ҳам. Очиғини айтсам, раҳбарият ва мухлислар олдида ноқулай аҳволдаман. Ишлар бундай тус олаётгани жуда аламли. Ишонч бўлса, тўлиқ ваколат берилса, вазиятни ўнглаймиз. Мен эса ўз ишимни виждонан бажаряпман. Бизда дам олиш кунлари ҳам, байрамлар ҳам йўқ.
Биз ўз ишимизни қиляпмиз. Биласизми, менда биринчи марта бундай ҳолат бўлиши. Одатда менинг жамоаларим сўнгги дақиқаларда ҳужумда ғалабани илиб кетар, ўйинларни доим шу тарзда якунларди. Бугун эса, кўриб турганингиздек, вазият тескари. Балки, ҳаммасини бошдан кечириш керакдир. Агар бардош бера олсак, агар бундан кейин ҳам ишонч бўлса, демак, вазият ўнгланади. Биз бунинг учун қўлимиздан келганини қиляпмиз.
