Маълум бўлишича, президент бу масалада Сунъий интеллект (СИ) билан маслаҳатлашган.
Эслатиб ўтамиз, ўтган шанба куни америкалик мутахассис қўл остида сан-себастьянликлар финалда "Атлетико"ни мағлуб этиб (2:2, пен. 4:3), кубокка эга чиқишганди. Аперрибайнинг айтишича, спорт директори Эрик Бретос унга Матараццо номзодини таклиф қилганда, президент бу мураббий ҳақида ҳеч нарса эшитмаган бўлган.
"Эрик Матараццони таклиф қилди ва мен Сунъий интеллектдан у "Реал Сосьедад" учун мос мураббийми деб сўрадим. СИ "йўқ" деб жавоб берди. Яхшиямки, мен Эрикка ишонган эканман", — деди Аперрибай "El Larguero" дастурида.
Президентнинг қўшимча қилишича, ярим финалда "Атлетик" устидан қозонилган ғалабадан сўнг у СИга яна ўша саволни берган: "Ярим финалдан кейин СИ бу ажойиб танлов эканини айтди. Мен мураббий билан биринчи учрашувдаёқ лол қолгандим, чунки у ҳамма ҳақида ҳамма нарсани биларди. Унинг "Реал Сосьедад" ҳақидаги таҳлили ҳайратланарли эди".
