- Ўйин ҳақида фикрингиз?
- Бугун жанговор ўйин кўрдик. Ҳар икки жамоада хоҳиш кучли эди. Иккала жамоа ҳам ғалабага лойиқ ўйин кўрсатди, лекин дуранг қайд этилди.
- Ҳакам "Лочин" футболчисига кўрсатган қизил карточка борасида фикрингиз?
- Билмадим, буни ҳакамлар ҳал қилади. Мен фақат футболчининг қўли тўпга текканини кўрдим.
- Дуранг жамоангизни қониқтирдими?
- Йўқ, биз бу ерга ғалаба учун келгандик. Қизил карточкадан кейин бир киши кўп ҳаракат қилдик, кўпроқ олдинга ўтишимиз керак эди.
- Бугун ҳужумкор футболни мақсад қилганмидингиз ёки қарши ҳужумларда ўйнашними?
- Таркибимизда ёшлар кўп. Асосан 2008-2009 йилда туғилган футболчилардан иборат. Мен бу ёшдаги болаларга дуранг учун ўйнаймиз демайман. Шогирдларимни фақат ғалаба учун руҳлантиришга ҳаракат қиламан. Ҳимояни тўғри ушлаган ҳолда ҳужум уюштиришни мақсад қилгандик. Иккинчи бўлимда схемани ўзгартириб тўлиқ ҳужумкор ўйинга ўтдик.
- Пролигада қатнашишдан мақсад натижа кўрсатишми ёки шу орқали ёшларни катта клубларга тавсия қилишми?
- Биз учун натижа муҳиммас, биз "Пахтакор" асосий жамоаси учун футболчи етиштириб беришни мақсад қилганмиз. Лекин барибир футболчиларга натижа учун майдонга чиқмаймиз демаймиз. Уларга тўғри футбол ўйнаш кераклигини уқтирамиз. Ёшларни катта жамоага тайёрлаб берсак ишимизни бажарган бўламиз.
- Агар натижалар салбий бўлса, бунга клуб раҳбариятининг муносабати қандай бўлади? Эътироз билдириладими?
- Ўтган тур яхши ўйин кўрсатиб мағлуб бўлдик. Бугун дуранг қайд этдик. Клубимиз раҳбарияти бизга гапиргани йўқ. Секин-аста ёшларнинг тажрибаси ортиб боради. Раҳбарларимиз билан муносабатимиз яхши, раҳбарият биз мураббийларга ёшларни яхши ўйин кўрсатишга ўргатинглар дейди. Бу футболчилар икки йил олдин U-19да ўйнарди, ўтган мавсум Биринчи лигада қатнашдик. Бу йил эса ўз кучимизни Пролигада синаб кўряпмиз. Раҳбарият жамоамизга ишонч билдириб Пролигага қўйди.
- Жамоангизда энг кучли ва кучайтирилиши керак бўлган чизиқ қайси?
- Уч-тўрт нафар футболчимизда жароҳат бор. Улар майдонга қайтгач чизиқларимиз янаям кучли бўлади. Ҳозир ҳам ўйнатсак бўлади, лекин футболчи соғлиғи муҳим бўлгани учун асраб турибмиз.
- Сафар ўйинларига бориш, машғулот ўтказиш - умуман моддий жиҳатлар бўйича муаммо йўқми?
- Йўқ, бу борада муаммо йўқ. Ҳаммаси яхши. Клубимиз раҳбарияти томонидан барча шароит қилиб берилган.
