Ikki davlat nomi yonma-yon kelganda, ko'pchilik futbol tahlilchilari va muxlislar yashil maydondagi shiddatli bahslarni emas, balki 2018 yilda yuz bergan, futbol tarixidagi eng shov-shuvli va g'alati kelishuvlardan birini yodga oladi. Bu voqea "Saudiya ekspressi" nomi bilan tarixga muhrlangan.
2018 yilgi Rossiyada bo'lib o'tadigan Jahon chempionati arafasida Saudiya Arabistoni sport rahbariyati terma jamoa o'yinchilarining tajribasini oshirish va Yevropa futboli havosidan nafas olishi uchun noananaviy yo'l tanladi. Saudiya Arabistoni futbol federatsiyasi va Ispaniyaning La Ligasi o'rtasida ko'p millionlik tijoriy shartnoma imzolandi.
Kelishuvga ko'ra, qishki transfer oynasida to'satdan 9 nafar saudiyalik futbolchi Ispaniyaning turli klublariga – ham yuqori divizion, ham Segunda jamoalariga ijaraga berildi. Xususan, Salim Al-Dovsari "Vilyarreal", Fahad Al-Muvallad "Levante", Yahyo Al-Shehri esa "Leganes" tarkibiga borib qo'shildi. Boshqa o'yinchilar esa quyi liganing "Sporting Xixon", "Numansiya", "Rayo Valekano" va "Valyadolid" kabi klublariga taqsimlandi.
Maqsad ezgu edi – saudiyalik yulduzlarni dunyoning eng kuchli ligalaridan birida toblash va ularni Jahon chempionatiga yuqori formada olib borish. Ammo amalda bu jarayon sof tijoriy marketing yurishi bo'lib chiqdi. Ispan klublari bu transferlar uchun kattagina moliyaviy homiylik pullari olishdi, biroq jamoa murabbiylari tayyorgarligi past va til bilmaydigan bu futbolchilarni maydonga tushirishga umuman shoshilishmadi.
Oqibatda nima bo'ldi? Saudiya futbolining o'sha vaqtdagi asosiy yulduzlari Ispaniyada oylab zaxira o'rindig'ini "isitib" o'tirishdi. Masalan, Salim Al-Dovsari mavsum so'ngida "Real Madrid"ga qarshi faqat bir martagina, u ham bo'lsa so'nggi daqiqalarda maydonga tushdi. Fahad Al-Muvallad esa "Levante" safida atigi ikkita o'yinda qatnashdi. Qolgan aksariyat futbolchilar asosiy tarkib u yoqda tursin, hatto o'yin qaydnomasiga ham kiritilmadi.
Futbolchilar Yevropa futboli havosidan nafas olishdi, biroq 6 oy davomida o'yin amaliyotisiz qolib ketganlari sababli jismoniy sport formalarini yo'qotishdi. Natijada Jahon chempionatining ochilish o'yinida Saudiya Arabistoni mezbon Rossiyaga 0:5 hisobida yirik ko'rinishda mag'lub bo'ldi.
Bunday "tajriba almashish" dasturi ispan muxlislari va mahalliy OAV tomonidan keskin tanqid qilindi. Ko'pchilik buni "pul evaziga tarkibdan joy sotib olish" deb baholadi va sport principlariga zid ekanligini ta'kidladi. Shunga qaramay, bu g'alati loyiha ikki mamlakat futbol rahbariyatlari o'rtasidagi aloqalarni mustahkamlashga xizmat qildi. Keyinchalik Ispaniya Superkubogining aynan Saudiya Arabistonida o'tkazilishi va buning ortidagi milliardlik shartnomalarning poydevori aynan o'sha "Saudiya ekspressi" davrida qurilgan edi.
Bugungi kunga kelib esa vaziyat tubdan o'zgargan. Saudiya Arabistoni endi o'z o'yinchilarini Yevropaga "majburan" jo'natmayapti, aksincha, Yevropaning eng oldi yulduzlarini milliardlab mablag' evaziga o'z chempionatiga olib kelmoqda.
JCH-2026'ni Allplay'da tomosha qiling - CHAMPIONATASIA promokodi bilan 45 kun bepul
Promokodni faollashtirish HAVOLASI
Oqil Abdubarnoev tayyorladi.
