Rossiyada bo'lib o'tgan jahon chempionatiga “Bunyodkor” klubining yetakchi muxlislari bilan birga avtomobilda borganimiz haqida ko'p bor xabar bergan edik. Bir necha kun oldin tong saharda Rossiyadan yurtimizga eson-omon qaytib keldik.
SAMARA
SENEGAL - KOLUMBIYA
Bir oycha avval “Bunyodkor” klubining yetakchi muxlislari bilan Rossiyada bo'lib o'tgan Jahon chempionatini tomosha qilish va mundial havosidan bahra olish uchun rus diyoriga avtomobilda borib o'yinlarni kuzatib qaytdik. Mening futboldagi yagona orzum amalga oshganidan baxtiyorman. Birinchi marotaba Jahon chempionati havosidan bahra olib yurtimizga qaytib keldim.
Biz Toshkentdan Rossiyaga borish uchun Qozog'iston orqali yo'lga chiqdik. Manzilimizga eson-omon yetib olish uchun holdan toyganimizda mehmonxonaga joylashib, u yerda hordiq chiqarib, ertasi kuni yana yo'lga tushdik. Dastlab Qozog'istonning Aktobe shahrida bir kecha tunashga qaror qildik va ertasiga Rossiyaning Orenburg shahriga yetib bordik. Ushbu shaharda ham bir kecha kun tunaganiimizdan so'ng, tong saharda Samara shahriga tomon yo'lga otlandik. Kun qoraymasidan Rossiyaning Samara shahriga yetib bordik. Ushbu shaharga kirib kelishimiz bilan Jahon chempionati muhitiga kirib qolganingizni sezmay qolasiz. Bir haftaga yaqin vaqt ichida biz Samara shahrida bo'ldik. Rossiyada bo'lib o'tayotgan Jahon chempionatidagi dastlabki tomosha qilgan o'yinimiz “H” guruhidan o'rin olgan Senegal – Kolumbiya terma jamoalari o'rtasidagi uchrashuvi bo'ldi.
Ushbu o'yinda “Kosmos-Arena” tribunalari kolumbiyalik muxlislar bilan to'lib toshdi. Senegaldan kelgan muxlislar esa ularga nisbatan kamroq edi. Shunday bo'lsada, Afrika qitasidan kelgan futbol muxlislari ham ulardan qolishmasligini amalda isbotlab qo'ydi. Senegallik ishqibozlar o'z suyuklilarini tinmay qo'llab-quvvatlab turishdi. Bo'lib o'tgan ushbu bahsdan so'ng senegallik muxlislar terma jamoasining mag'lubiyatini va mundialdagi o'z yurishini guruh bosqichidayoq to'xtatishganini hazm qila olishmadi. Senegallik ishqibozlar ushbu mag'lubiyatdan so'ng ko'z yoshlarini tiyib tura olishmadi. Bu shunchaki daxshat! Ikkala terma jamoa muxlislari stadiondan tashqariga chiqishganidan so'ng senegallik muxlislar kolumbiyaliklarni g'alaba bilan tabriklashdi, kolumbiyaliklar esa senegallik ishqibozlarga taskin berishdi. Bu muxlislik madaniyati ularda birinchi o'rinda turishidan dalolat berib turardi.
"FIFA FAN FEST SAMARA"
BRAZILIYA – MEKSIKA
Biz Samaradagi “Kosmos-Arena”da yana bir uchrashuvni stadiondan turib tomosha qilishga muvaffaq bo'ldik. Jahon chempionatining nimchorak final bosqichidan o'rin olgan Braziliya – Meksika terma jamoalari o'rtasidagi uchrashuvni kuzatdik. Ushbu o'yin faoliyatimdagi unutilmas voqea bo'ldi. Sababi, dunyo yulduzlari to'p tepadigan Braziliya terma jamoasini bir necha metr uzoq masofadan ko'rishning o'zi insonga quvonch bag'ishlaydi.
MOSKVA
Samara shahridagi ikki uchrashuvni tomosha qilgach, Moskva tomon yo'l oldik. Uzoq yo'l bosib Moskva shahriga yetib keldik. Rossiya poytaxtiga Angliya – Shvetsiya uchrashuvi boshlangan paytda yetib keldik. Biz ushbu uchrashuvni tomosha qilish uchun stadionga yetib bordik. Afsuski chiptalar bir dona ham topa olmaganimiz uchun ushbu uchrashuvni stadiondan turib tomosha qila olmadik. Moskva shahrida bir kun bo'ldik. Mana shu bir kunimizdan unumlii foydalanish maqsadida barchaga mashhur bo'lgan “Qizil maydon”ga bordik. U yerda FIFA tomonidan muxlislar uchun maxsus hudud tashkil qilingan ekan.
Ushbu maydonchaga kirib kelishingiz bilan siz maxsus tekshiruvdan o'tasiz, sizdda ortiqcha buyum bo'lmasa ichkariga bemalol kirib borishingiz mumkin. Maxsus tekshiruvdan o'tganingizdan so'ng sizni volantyorlar kutib olishadi va ular sizga FIFAning Jahon chempionati uchun maxsus chiqarilgan kitobchasini taqdim etishadi. Ushbu hududda futbol o'ynash uchun maxsus maydoncha, FIFAning maxsus do'koni, xattokiyuluzlar bilan suratga tushish uchun ham sharoitlar yaratib berilgan. Biz yuqorida aytib o'tilgan barcha joylarga bordik va u yerdagi barcha narsalarni tomosha qildik. Shu bilan Sankt-Peterburg shahrida bo'lib o'tadigan yarim final o'yinidan bir necha kun avval ushbu shaharga yetib bordik.
SANKT-PETERBURG
FRANSIYA - BELGIYA
Ushbu shaharda ham birinchi borgan joyimiz “Fan Zona” bo'ldi. Shu kuni Jahon chempionatining mezbon jamoasi Rossiya Xorvatiya terma jamoasiga qarshi chorak final bosqichida maydonga tushishi kerak edi. Taqdirning taqozosi bilan Sankt-Peterburgda joylashgan “Fan Zona”da Rossiya – Xorvatiya terma jamoalari o'rtasidagi chorak final bosqichini tomosha qildik. Shu kuni “Fan Zona”ga juda ham ko'plab futbol muxlislari tashrif buyurishdi.
"Krestovskiy Arena"
“Fan Zona”ga kelgan muxlislar bemalol bitta stadionni to'ldirishi turgan gap. Rossiya ushbu jahon chempionatiga ancha tayyorgarlik ko'rgani aniq, sababi tashkilotchilik a'lo darajada. Bu yilgi Jahon chempionati tashkilotchilik borasida qolganlaridan ancha farq qiladi. Rossiya mamlakati ushbu mundialga o'zgacha tarzda yondoshgani shundoqqina bilinib turardi. Stadionlardagi, “Fan Zona”dagi va ko'chadagi muhitdan futbolga bo'lgan e'tibor ancha kuchli ekanligini his qilish mumkin. Rossiyada bo'lib o'tgan Jahon chempionatini shunchaki so'z bilan tariflab bera olmayman. Buni his qilish uchun bir marotaba mundial havosidan bahra olishni maslahat beraman.
P.S. Men birinchi marotaba jahon chempionati nimaligini borib ko'rdim va his qildim. Yuqorida ta'kidlab o'tganimdek barcha futbol muxlislariga bir marotaba bo'lsaham imkon qadar jahon chempionatiga borishlarini aytmoqchiman. Men u yerda ko'plab OAV vakillari bilan suhbatlashdim, hattoki BBC telekanali muxbiridan intervyu olishga ham erishdim. Bu men uchun juda ham katta yutuq. Jahon chempionatiga kelishimning o'zi katta baxt. Buning uchun championat.asia saytiga va “Bunyodkor” klubining yetakchi muxlislariga katta rahmat aytaman. Bu mening championat.asia yozgan so'ngi maqolam. Nima bo'lganda ham hayot davom etadi. Men seni sog'inaman CA.
Jahongir Sotvoldiev
