Islombek, “Lokomotiv” bilan uchrashuvdan keyingi taassurotlar qanday?
- Juda qiziqarli va murosasiz bahs kechdi. Mazkur bellashuvdagi muvaffaqiyat biz uchun juda muhim ahamiyatga ega bo'lgandi. Qolaversa, raqibimizga ham muvaffaqiyat zarurligi sabab qiziqarli uchrashuv bo'lib o'tdi.
- G'alaba qay tariqa qo'lga kiritildi?
- Biz g'alaba haqli edik deb o'ylayman. Chunki bizda raqibga qaraganda, ko'proq vaziyatlar yuzaga keldi. Shuningdek, jamoaviy bo'lib, g'alaba qozonish uchun oxirigacha intildik. Natijada, muhim va qiyin bo'lgan 3 ochkoga ega bo'ldik.
- Bu jamoangizning “Lokomotiv” ustidan qozonilgan dastlabki g'alabasi ekanligi sababli o'zgacha kayfiyat taqdim qilgan bo'lsa kerak?
- Ha, albatta. Bu muvaffaqiyat butun jamoamizga o'zgacha kayfiyat taqdim qilganligi rost.
- Jamoaning ketma-ket mag'lubiyatlariga nima sabab bo'ldi?
- Faqat omad yetishmadi deb o'ylayman. To'g'ri, biz ketma-ket mag'lubiyatlarga duch keldik. Bu esa turnir jadvalidagi holatimizga o'z ta’sirini o'tkazdi. Lekin o'sha bahslarda jamoadan omad ochiqchasiga yuz o'girdi. Har bir o'yinda 2-3ta gol urishimiz mumkin. Hal qiluvchi vaziyatda omadimiz kelmayapti va raqibga imkoniyatlarni boy berib qo'ydik.
- “Surxon”ning Superligada qolish imkoniyatini qanday baholaysiz?
- Albatta, biz Superligada qolish uchun yaxshi imkoniyatga egamiz. Barchasi o'z qo'limizda. Qolaversa, hozirda vaqtda bizdan tepada turgan jamoalar bilan ochkolar tafovuti u qadar katta emas. Oldinda turgan bellashuvlarda ijobiy natijalarga erishsak, albatta, vaziyatni o'zgartira olamiz. Ishonamanki, “Surxon” elitada qolishni uddasidan chiqadi.
