– Ўйин ҳақида фикрингиз...
– Бугун бир очкони қўлга киритдик. Очиғи, бу ўйин осон кечмаслигини билардик, чунки "Қўқон-1912"га ҳам, бизга ҳам очко жудаям зарур эди. Шунинг учун биз бу ерга уч очко учун келгандик. Қаердадир омад етишмади ва шогирдларимда озгина реализация етишмади. Футболчиларимизга раҳмат айтаман. Борини бериб, қўлидан келган барча имкониятларидан фойдаланишга ҳаракат қилишди.
– Бугун биринчи расмий учрашувда бош мураббий сифатида бошлаб чиқдингиз. Умуман ўйнамаган футболчилар асосий таркибга қўйилди. Бу нима билан боғлиқ? Сизнинг ташаббусингизми ёки улар энди тайёр бўлишдими ёки эски бош мураббий буларга умуман имкон бермаганмиди?
– Йўқ, унақа демаган бўлардим. Авваламбор, биздан олдин ишлаб кетган Самвел Бабаянга, унинг штабига каттакон раҳмат айтамиз. Қўлларидан келган барча ишларни қилди, қаердадир омад етишмади. Омад етишмади. Шунинг учун биз баъзи бир ўзгаришларни қилишга қўл урдик. Барибир қаердадир, ҳар доим бир хил таркибда ўйнаётган йигиларда мағлубиятдан кейин ўзига ишонч шунақа йўқолиб бораётган эди. Ўйнамаётган футболчиларда иштиёқни кўрган ҳолда ротацияларга қўл урдик.
– Дуранг ўйин картинасига қанчалик мос тушди деб ҳисоблайсиз?
– Очиғи, биз футболчиларнинг потенциалидан келиб чиқиб иш тутамиз, яъни улар тўп билан яхши ўйнай олади. Шунинг учун ўйинда тўпни назорат қилиб, доминантлик ғоясини қўллаяпмиз. Бунинг учун бизда озгина вақт бўлди. Чунки 1–зонадан қанақа қилиб чиқиб кетишимиз, тўпни назорат қилиб 2–зонада қанақа қилиб ривожлантириш ва 3–зонада қанақа қилиб якунлаш бўйича битта машғулотимиз бўлди, холос. Машғулотимиз оз бўлганини ҳисобга олган ҳолда, футболчилар вазифаларни аъло даражада бажаришди ва бугунги ўйинда яхши кўрсатиб беришди. Ўйиндан ўйинга кучайтириб борамиз. Машғулотимиздан келиб чиқиб айтсам, дуранг биз учун яхши натижа.
– Ўзингиз таъкидлаб ўтдингиз, захирадагилар имконият берилмоқда. "Андижон" сафида ўтган мавсум асосий таркибида ўйнаган бир қатор футболчилар ўринбосарларга тушириб юборилганди. Улар ҳам яна қайтишадими, мисол учун, Азимов?
– Албатта. Биз кузатиб боряпмиз, эътибор берган бўлсангиз, бугун ўринбосарлар таркибида ўйнайдиган, 2006 йил туғилган Бекзод Сулаймоновни майдонга туширишни бошладик. Ўзини ўринбосарлар таркибида яхши кўрсатганлиги учун уни асосий таркибга жалб қилдик ва захирадан туширдик. Бора–бора шундай ўринбосарлар таркибига ҳам эътибор бериб, иқтидорли футболчиларни чақирамиз.
– Келажагингиз ҳақида сўрамоқчиман. Ҳозирча вақтинча бош мураббий вазифасини бажарувчисисиз. Келажагингиз ҳақида айтиб ўтсангиз, "Андижон" кейинги ўйинларда яхши натижа қайд этса, раҳбарият сизни олиб қоладими? Яна битта саволим: "Андижон" жамоасида жуда катта номлар бор, улар билан ишлаш қанчалик қийинчилик туғдирмаяптими?
– Биринчи саволга келадиган бўлсак, бу кўпроқ раҳбарларимизга боғлиқ бўлади. Лекин биз яхши натижа кўрсатишга максимал ҳаракат қиляпмиз. Уч ўйиндан кейин қарорни раҳбарият ҳал қилади. Машҳур футболчиларга келадиган бўлсак, улар нима учун у даражага чиқиб ўйнашяпти? Уларга таниқли мураббийми, авторитетми – фарқи йўқ. Улар профессионал, шунинг учун шу даражага чиқишди ўзларининг меҳнати билан, меҳнатсеварлиги билан ва тартиб–интизоми билан. Шунинг учун улар билан ишлаш янаям осонроқ. Нимани хоҳлаб, уларга бераётган бўлсак, қабул қилишяпти. Энг асосийси, уларга ҳам шу футбол ёққанга ўхшаяпти, айтганимизни қабул қилишяпти.
