Жумладан, Дониёр Абдуманнопов ҳам мураббийлар кўрсатмаларини бажариш, ўз маҳоратини ошириш устида жиддий меҳнат қилмоқда. Клуб матбуот хизмати футболчи билан йиғин ҳақида суҳбат уюштирди.
— Анталия йиғини юқори кайфиятда ўтаётганини кўряпмиз. Тайёргарлик жараёни ҳақида нима дейсиз?
— Ассалому алайкум. Йиғин яхши ўтяпти. Қишки тайёргарликда асосий эътибор жисмоний ҳолатга қаратилади. Жамоага янги футболчилар келди, улар билан бир-биримизни тушуниш учун кўпроқ ўйинлар ўтказяпмиз. Ўйиндан ўйинга жамоавий ҳаракатлар яхшиланмоқда. Худо хоҳласа, чемпионатга яхши формада борамиз.
— Йиғин давомида ўртоқлик учрашувлари ҳам ташкил этилмоқда. Хориж клубларига қарши баҳслар сизга нималар беряпти?
— Ҳар бир ўйинда ўз ҳаракатларимни таҳлил қилаяпман. Асосан хатолар устида ишлаяпман.
— Янги мавсумда жамоа олдига жиддий мақсадлар қўйилган. Шахсан ўзингиз янги мавсумдан нималар кутяпсиз?
— Мақсад доим юқори бўлади. Буни амалда исботлаш керак. Биз ҳаракат қиламиз ва қолганини Яратгандан сўраймиз.
— Янги мавсумни Сўғдийонага қарши ўйин билан бошлайсизлар. Илк тур муҳитини қандай тасаввур қиляпсиз?
— "Бобур арена"да мухлислар қўллаб-қувватлаши доим ажойиб бўлади.
— "Андижон" сафида 33-рақамни танладингиз. Бу рақам нима билан боғлиқ?
— 33-рақамда айнан "Андижон"да футбол ўйнай бошлаганман. Шунинг учун мен учун қадрли рақам ҳисобланади.
