“Andijon”ni oliy ligada qolganidan so'ng Abdurahimov “SA”ga o'z fikrlarini bildirib o'tdi. Ancha kamgap bo'lgan Bahrom bilan suhbat uyushtirishimiz oson kechmadi.

- “Andijon”ni oliy ligada qolishi siz kabi boshqa jamoadoshlaringizni ham xursand qilgan bo'lsa kerak? Umuman aytganda jamoani elitada qolishiga qanchalik ishongandingiz?
- Rosti kecha futbolchilar bilan gaplashganimda kelasi yil ham “Andijon” oliy ligada ishtirok etarkan degan xabarni eshitib, juda quvonib ketdim. O'FF prezidenti Mirabror Usmonov tomonidan munosib sovg'a bo'ldi. Fursatdan foydalanib butun jamoamiz nomidan qolaversa Andijon xalqi nomidan Mirabror Zufarovichga minnatdorchilik izhor etaman. Bunday imkoniyat har doim berilavermaydi. Xalqimizda ko'r hassasini bir marta yo'qotadi degan gap bor. Shunday ekan kelasi yil endi munosib ishtirok etish talab etiladi. Muxlislarni xursand qilish kerak!

- Jamoaning uchinchi bor oliy liga bilan xayrlashishiga nima sabab bo'ldi deb hisoblaysiz?
- Birinchi ligadan kuchlilar safiga chiqqanimizdan so'ng yana elitani tark etishni hattoki hayolimga ham keltirmagandim. Chunki bunday tarkib bilan bemalol turnir jadvalining kamida o'rta pog'onalarida yurishimizga ishongandim. Biroq ayrim sabablarga ko'ra, jamoa chempionatni so'nggi o'rinda tugatdi. Albatta bu barchamiz uchun qayg'uli edi. Bunday bo'lishini sira istamagandik. Bu yil so'nggi o'rinni egallashimizda alohida bir sababni ko'rsatish qiyin. Bunda butun jamoaning aybi bor. Rahbariyatdan tortib, futbolchilargacha. O'zingizga yaxshi malum, jamoamizda murabbiylar almashinuvi juda ko'p yuz berdi. Bir mavsumning o'zida 4ta murabbiy bilan ishladik. Albatta bu ham salbiy tasirini o'tkazmasdan qolmadi. Chuqur tahlil qiladigan bo'lsak, gap ko'p.

- Jamoa birinchi ligaga tushib ketgach, ko'plab futbolchilar o'zlarini oliy liga jamoalarida sinab ko'rishga ahd qilayotgandi. Endi ularning ayrimlari bu qaroridan qaytishi ham mumkin deb taxmin qilamiz. Shaxsan siz keyingi taqdiringiz xususida nima deya olasiz?
- Keling yaxshisi bu sir bo'la qolsin. Qishki yig'inlar boshlangandagina bir to'xtamga kelishim mumkin. Ungacha aniq bir fikr bildira olmayman.

- Aytishlaricha jamoa futbolchilar bilan to'liq hisob-kitob qilmagan ekan. Shu rostmi?
- Ha. Menimcha qolib ketgan oylik va mukofot pullarimizni endi berishsa kerak.

Islombek Rustambekov suhbatlashdi.

Bahrom Abdurahimov: “Andijon”ni oliy ligada qolishi munosib sovg'a bo'ldi”