Chunki, u to'rtta uchrashuvda ikki marta maydondan chetlatildi. Xabaringiz bor, rostovliklar joriy mavsumda Chempionlar Ligasining guruh bosqichida ishtirok etishadi. Jamoa turnirdagi dastlabki uchrashuvini Myunxenning Bavariyasiga qarshi o'tkazdi. Ana shu o'yin oldidan futbolchi intervyu berdi.
- Shahar kunini qanday nishonladinglar? Qayerda edingiz, nimalarni ko'rdingiz?
- Oilam bilan markazni aylandim. Keyin Kalachyov bilan restoranda o'tirdik. Salyutga bordik. Qisqasi, bizga yoqdi.
- Uch oylik o'g'lingiz ham birgamidi?
- Yo'q. U enagasi bilan parkda edi. Uning o'z kun tartibi bor.
- Nima uchun o'g'lingizga Leonardo deb ism qo'ygansiz?
- Milanni aylanib yurganimizda xayolga kelib qolgan. Turmush o'rtog'imga bu ism yoqib tushgan. Qarorimizga futbolchi Leonardo ham, aktyor Di Kaprio ham sababchi bo'lishmagan.
- Rostov bir yildan oshiq vaqt mobaynida o'z maydonida mag'lub bo'lmayapti. Bunga stadiondagi energetika yordam beryaptimi?
- Energetikaning o'rni bor. Odamlar ham futbolchilarga nisbatan mehribon bo'lib qolishgan. Buning ustiga jamoamiz bir yoqadan bosh chiqarmoqda.
- To'rtta o'yinda ikkita chetlatish. Hakamlar sizni yoqtirmay qolishganmi?
- Bilmasam, ularning o'zidan so'rash kerak. Menimcha, qizil kartochkalar nohaq berildi. Boshqa kuchli jamoalarga qaraganda, bizning o'yinlarimizni biroz boshqacha boshqarishadi.
- Sizningcha, nechta kartochkani nohaq berishdi?
- To'rtta sariq kartochkadan ikkitasi 100 foiz nohaq berildi. Ularning ikkisi ham bir o'yindagi ikkinchi sariq edi.
- Bu bilan o'rtamiyona klublarga boy jamoalarga qaraganda past nazar bilan qarashadi demoqchimisiz?
- Buni mas'ul shaxslar o'ylashsin. Mazkur masalani muhokama qilmoqchi emasman.
- Peterburgdagi qizil kartochka Rostovning o'yiniga salbiy ta’sir o'tkazdimi?
- Agar to'liq tarkibda o'ynaganimizda ular hatto bitta gol ham ura olishmasdi.
- Bashtush va Novoselcevlarning yo'qotilishi jamoaning himoyasiga jiddiy ta’sir o'tkazdimi?
- Har bir futbolchining yo'qotilishi ta’sir o'tkazadi. Rostov uchun har bir o'yinchi muhim. Terekka qarshi o'yinda hamma ham o'z chizig'ida o'ynamadi. Natijada, ancha qiynaldik. Umid qilamanki, keyinchalik bunday muammolarga duch kelmaymiz.
- Sardor sifatida yangi futbolchilarga yordam berasizmi?
- Kerak bo'lganda yordam beraman. Prepelice bilan rumin tilida gaplashaman. Mixa sloveniyalik va u ham rumin tilini tushunadi.
- Papa Guye Ukrainadagi faoliyati davomida rus tilini o'zlashtirganmi?
- Ha. U bilan umumiy tanishimiz bor. Bordiyan Xarkovda Papa bilan etti yil birga o'ynagan. Ular men orqali bir-birlariga salom yo'llashadi.
- Rostov futbolchilari Bashtush va Novoselcevlarning transferidan so'ng moliyaviy holat yaxshilanganini his qilishdimi?
- Moliyaviy holat haqida gapirishni istamasdim. Bu savollarni rahbariyatga bergan maqulroq.
- Berdiev vice-prezident lavozimini egallaganidan so'ng mashg'ulotlar jarayonida ishtirok etmayaptimi?
- Odatdagidek Dmitriy Sergeevich mashg'ulotlarni olib bormoqda. Qurbon Bekievich esa kuzatadi. Agar kerak bo'lsa qo'shimcha kiritadi.
- Amsterdamda Berdievning kiyinish xonasiga kirganini inkor etmassiz?
- Kirdi va Barcha sizlarga ishonadi. Natija ko'rsatinglar, dedi.
- Berdievning ketishi haqidagi gap-so'zlar ta’sir o'tkazdimi?
- Bu haqda e'lon qilishganida jamoa asabiylashdi. Buni Uralga qarshi o'yinimizni ko'rganlar sezishgan bo'lsa kerak. Lekin vaziyatdan chiqib ketish uchun bir-ikki kun kerak bo'ldi, xolos.
- Yozgi transferlar bozori paytida Rostov yetakchilariga qiziqishlar ko'p bo'ldi. Sizga boshqa jamoalardan takliflar tushdimi?
- Menga hech kim murojaat qilmadi.
- Bavariya Shalkeni mag'lub etganini ko'rdingizmi?
- Ha.
- Taassurotlar qanday?
- Yaxshi jamoa, yulduzlar.
- Uch yil oldin Leonid Sluckiy Bavariya - bu kosmos degandi.
- Haqiqatan ham kosmos.
- Unda Rostov nima?
- Rostov - kosmosni zabt etadigan raketa.
- Terma jamoa safida Robert Levandovskiga qarshi o'ynagansiz. U sizga yoqqanmi?
- Yaxshi futbolchi. Lekin terma jamoada klubdagichalik o'yin namoyish qila olmaydi.
J.BOBOXONOV tayyorladi
