Забиҳилло Ўринбоев: "Металлург"га меҳримиз бошқача, ўтиш ўйинида фақат бир нарсадан жаҳлим чиқди..."

Турнир жадвалида сўнгги поғонада борган жамоа ўтиш баҳслари орқали Суперлигадаги ўрнини сақлаб қолди. "Металлург" ҳужумчиси Забиҳилоо Ўринбоев бу борада фикрлари билан ўртоқлашди. 

- "Металлург"ни Суперлигада олиб қолиш қандай уддаланди?

- Аллоҳнинг меҳрибонлиги мўъжиза бўлишига сабабчи бўлди. "Металлург"ни Суперлигада олиб қолишнинг уддасидан чиқдик. Менимча, муҳим паллада барчамиз бирлаша олдик. Мураббийлар нима истаётганини тушунди. Барчамизда хоҳиш кучли эди. 

- Қорли майдонда ўйнаш тажрибаси сизда бор. Об-ҳаво ўз таъсирини ўтказмадими?

- "Олимпик" билан ўйиндан олдин очиғи битта нарсадан жаҳлим чиқди. Майдоннинг ярими тозаланган, ярими тозаланмаганди. Барибир бу ҳолат футболнинг сифатига, тезлигига таъсир қиларди. Бу икки жамоага ҳам тўсқинлик қиларди. Омад эса бизнинг томонда бўлди. Вазиятларимиз гол билан якунланди.

- Оғир жароҳатдан сўнг қайтиш ўзгача ҳиссиётларни бергани тайин... 

- Ўзим учун яхши тажриба йиғдим. Оғир жароҳатдан сўнг қайтдим. Ҳар томонлама киришиб олиш осон кечмади. Энди бундан ҳам кўпроқ ишлашим керак. Биринчи навбатда жамоа Суперлигада қолди. "Металлург"га меҳримиз бошқача. 

- Клубни тарк этганингиз маълум. Кейинги мавсум режаларини ўйлаб кўрдингизми?

- Жамоани тўлақонли тарк этмадим десам ҳам бўлади. Лекин шартномам тугади. Клубнинг кейинги режалари аниқ эмас. Ҳозирча оила даврасида дамни оламиз.