Уругвайга қарши ўйин олдидан Фабио Каннаваро нималар деди?

Ушбу учрашув олдидан миллий термамиз бош мураббийи Фабио Каннаваро матбуот анжуманида иштирок этди.

- Биз бу ерга кеча етиб келдик ва тикланиш машғулотларини олиб бордик. Бу ўйин олдингисидан фарқли бўлади. Чунки биз дунёнинг энг яхши термаларидан, қолаверса, энг яхши мураббийлардан бирига қарши ўйнаймиз. Албатта, бу қийин бўлади. Лекин биз қўрқмаймиз, ўзимизни кўрсатишни истаймиз. Бу ўртоқлик ўйини бўлса-да, юз фоиз кучимизни ишлатиб, майдонда боримизни берамиз.

- Ўтган ўйиндан кейин кўпроқ тўпни назорат қилиш устида ишлашимиз керак дедингиз. Эртанги учрашувда ҳам терма жамоа кўпроқ тўп назоратига эътибор қаратадими?

Бу ўзимизни кўрсатиш учун жуда яхши имконият. Кўпроқ тўпни назорат қилишга эътибор беришимиз керак. Чунки тўпни рақибга бериш керак эмас. Ўйин давомида рақибларга эътиборли бўлишимиз талаб қилинади. Умид қиламизки, эртага кўпроқ тўп назоратимизда кўпроқ бўлади.

- Ўртоқлик учрашувларида қайси рақиблар билан тўқнаш келишни маъқул кўрган бўлардингиз? Масалан, айрим мураббийлар кучсизроқ жамоаларга қарши ўйнашни хуш кўради, кимдир эса имкон қадар кучлироқ рақиб билан. Сизга қандай рақиблар танлангани маъқулроқ?

Рақибни биз танламаймиз. Эртага бизни жаҳоннинг энг кучли термаларидан бирига қарши ўйин кутиб турибди. Биз доимо шундай учрашувларга тайёргарлик кўришимиз керак.

- Сўнгги хорижлик мураббий Сречко Катанец дастлабки бир йил давомида ўртоқлик учрашувларидаги натижага умуман эътибор бермаган. Мисол учун, биз ўртоқлик ўйинида Иорданияга 3:0 ҳисобида ютқазганмиз. Сиз ўртоқлик ўйинига қандай назар билан қарайсиз? Натижа муҳимми ёки ўйин сифати? Сизнинг жавобингиздан келиб чиқиб футбол мухлислари ҳам ўртоқлик ўйинларидан бўлган кутилмалар ҳосил қилиб олишади...

Ютқазганимиздан кейин бизни гуллар билан кутиб олишади деб ўйламайман. Барчаси оддий, биз натижа ҳақида ўйлашимиз керак. Бу ўртоқлик ўйини, лекин катта куч билан меҳнат қилиш керак. Ҳамжиҳатликда, биргаликда ишлашимиз керак.

- Уругвайга қарши ўйинга бир нечта футболчилар олиб кетилмади. Яъний дастлабки учрашувда қайдномадан ўрин олганларнинг айримлари Малайзияга келмади. Ушбу қарорга изоҳ берсангиз?

- Ўртоқлик ўйини бўлишига қарамасдан ҳамма нарсани инобатга олишимиз талаб қилинади. Нимагадир тайёрланиш учун бундай ўйинлар яхши имконият. Чунки жаҳон чемпионати вақтида бунга вақтимиз бўлмайди. Албатта, бу менинг фикрим. Қолганларнинг ҳам фикрини ҳурмат қиламан. Бизни узоқ сафар кутиб турибди. Шу сабабли биз барчасига тўғри қарашимиз керак. Футболчиларни шунча йўлга олиб бориб, уларни чарчатиб, шунчаки машғулот учун олиб келиш керак эмас. Олдимизда 8 ой вақт бор, барчанинг ўйинларини тўлиқ кузатамиз.

- Гаттузонинг сизга айтган гапларини барча билиб бўлди. Унга нима дея жавоб бердингиз?

- Ҳозирги вақтда бор эътиборимизни эртанги ўйинга қаратганимиз яхшироқ.

- Кўпчилик Кападзе ва сизнинг ўртангиздаги муносабатларга қизиқмоқда. Мен жамоа ичида атмосфера яхши эканлигини кўрдим. Ўртангиздаги муносабатлар ҳақида гапириб ўтсангиз?

- Ҳозирги вақтда бор эътиборимизни эртанги ўйинга қаратганимиз яхшироқ.

Абдувоҳид Неъматов: - Мураббийимиз таъкидлаганидек, тикланиш машғулотини ўтказдик. Худо хоҳласа, эртанги ўйинга тайёрмиз. Албатта, бор кучимиз билан ҳаракат қиламиз.

Уругвай бутун дунёда ўз ўрнига эга термалардан бири. Мураббийларимиз видеолар орқали уларнин қандай футбол ўйнашини кўрсатишяпти. Ҳозир ҳамма рақибнинг кучли ва кучсиз жойларини билади. Биз ўз ўйинимизни кўрсатишга ҳаракат қиламиз.