"У ўйнаган ҳар бир стадионда нимадир содир бўлади!" — Моуринью Винисиуснинг хулқ-атворини танқид қилди

 "Special One"нинг фикрича, бразилиялик футболчи атрофидаги можаролар бежиз эмас.

Ўйин давомидаги машмаша:

Эслатиб ўтамиз, учрашувнинг 50-дақиқасида Винисиус голни бурчак байроқчаси ёнида рақсга тушиб, рақибни ҳақоратловчи тарзда нишонлагани учун сариқ карточка олган эди. Шундан сўнг у ва Джанлука Престианни ўртасида низо келиб чиқди. Винисиус рақибини ирқчиликда айблади ва ўйин маълум муддатга тўхтатилди.

Моуриньюнинг муносабати:

Мураббий Винисиуснинг гол нишонлашини ҳурматсизлик деб баҳолади ва футболчининг ўзини тутишига эътироз билдирди:

"Қайсидир жиҳатда хатолик бор, чунки бу воқеалар ҳар бир стадионда такрорланмоқда. Винисиус қаерда ўйнаса, ўша ерда албатта нимадир содир бўлади. Унинг гол нишонлаши мухлислар ва рақибга нисбатан ҳурматсизлик бўлди", — деди Моуринью.

Шунингдек, Жозе ўйин якунида ҳакамлар билан баҳслашгани учун қизил карточка олиб, майдондан қувилганини ҳам айтиб ўтди. Моуриньюнинг фикрича, футболчиларнинг майдондаги хатти-ҳаракатлари трибунадаги муҳитга бевосита таъсир ўтказади.