ОЧЛ-2. "Андижон"нинг гуруҳдаги рақиблари ҳамда мураббий ва футболчиларнинг қуръага муносабати

Осиё Чемпионлар лигаси-2 турнирининг 2025/26 йилги мавсумига қуръа ташланди. Ўзбекистоннинг "Андижон" клуби "B" гуруҳида Қатарнинг "Ал Аҳли", Туркманистоннинг "Арқадағ" ва Баҳрайннинг "Ал Ҳалдия" клублари билан куч синашади. Гуруҳдаги рақибларнинг ҳар бири ўзига хос кучли ва заиф томонларга эга. "Ал Аҳли" иқтидорли хорижлик ва маҳаллий футболчиларга эга, Туркманистон терма жамоаси асосини ташкил этувчи "Аркадағ" яқинда Осиё Челленж лигасида бош совринни қўлга киритган. "Ал Ҳалдия" 2020 йил ташкил этилганига қарамай, тезда ички чемпионатда етакчилар сафига қўшилди ва халқаро даражада тажриба тўплаб бормоқда.

"Ал Аҳли" 2024/2025 йилги мавсум Қатар Юлдузлар лигасида тўртинчи ўринни эгаллади. Аслида турнирга Қатарнинг учинчи жамоаси йўл олиши керак эди. Учинчи ўринни эгаллаган "Ал-Гарафа" Қатар амири кубогини қўлга киритгани сабабли Элит Чемпионлар лигасига йўлланма олди. Шу боис, учинчи ўринга ажратилган чипта тўртинчи ўринни эгаллаган жамоага берилди.

"Ал Аҳли" кучли таркиб ва етарли тажрибага эга бўлганига қарамай, етакчиларга қарши ҳеч нарса қила олмаган (жумладан, "Ал Садд"га 0:5 ҳисобида ютқазган) ва бошқа ўйинларда ҳам дарвозасидан кўп гол ўтказиб юборган (Қатар СКга 0:3 ҳисобида ютқазган). Лигани 4-ўринда якунлаган жамоанинг тўплар нисбати -1 ни ташкил этгани ҳам юқоридаги сўзларимизга исбот бўла олади.

"Ал Аҳли"ни хорватиялик мураббий Игорь Бишчан бошқаради. 47 ёшли мутахассис Хорватиянинг 21 ёшгача бўлган жамоаси, "Динамо Загреб", Саудия Арабистонининг "Ал Шабаб" клубларидаги фаолияти орқали таниш. Бишчан "Динамо Загреб" билан Хорватия чемпионати ва суперкубогида бош совринни қўлга киритган. Шунингдек, "Олимпия" билан Словения чемпионати ва кубогида зафар қучган.

"Ал Аҳли" таркибида кўплаб хорижлик футболчи мавжуд, айримлари икки мамлакат фуқаролигига эга. Уларнинг энг машҳури, шубҳасиз, 2014 йилги жаҳон чемпиони, германиялик Юлиан Дракслер ҳисобланади. 31 ёшли ҳужумкор ярим ҳимоячи 2023 йилдан бери ушбу клуб шарафини ҳимоя қилади. Шунингдек, нидерландиялик Мишель Врап, франциялик Иброҳим Диалло, испаниялик Эрик Экспосито каби иқтидорли футболчилар жамоа шарафини ҳимоя қилади.

"Аркадағ" Туркманистон терма жамоасининг асосини ташкил этади, шу боис, бу жамоага енгил кўз билан қараш керак эмас, аксинча, жиддий ёндашиш талаб этилади. 

Гурбангули Бердимуҳамедов 2023 йил асос солган ва маҳаллий чемпионатда шу пайтга қадар ютқазиш уёқда турсин, ҳатто дуранг ўйнамаган "Аркадағ" ўтган йил Осиёнинг учинчи даражали мусобақаси ҳисобланган Челленж лигада ғолиб чиқди ва Осиё Чемпионлар лигаси-2 йўлланмасини қўлга киритди. Қолаверса, туркманлар мезбонлик учрашувларини сунъий қопламали майдонда ўтказишади, бу эса рақибларга ноқулайлик туғдиради.

2025 йилда "Аркадағ"нинг 15 нафар футболчиси Туркманистон терма жамоасига чақирилган. Шунингдек, бошқа клуб сафида термага жалб этилганларнинг айримлари ҳуқуқий жиҳатдан "Аркадағ"га тегишли ҳисобланади. Ёзги трансфер ойнасида "Аркадағ" яқин таъқибчиси ҳисобланган "Аҳал"нинг уч нафар ўйинчисини таркибга қўшиб олди, бу эса уларнинг янада кучайганидан далолат беради. Жамоага Аҳмет Аллабердиев мураббийлик қилади.

"Аркадағ" маҳаллий чемпионатда жорий мавсум билан қўшиб ҳисоблаганда, кетма-кет 71 ўйиндан бери ғалаба қозонмоқда, бироқ Челленж лигада 8 ўйиннинг 2 тасида ютқазди.

2020 йил ташкил этилган "Ал Холидия" тезда Баҳрайн футболида ғайриоддий юксалишни бошдан кечирди. Биринчи мавсумидаёқ (2020-21) улар фақат битта мағлубият билан 2-ўринни эгаллаб, Баҳрайн иккинчи дивизионидан юқорига кўтарилишди. Кейинчалик, клуб ўз мавқеини мустаҳкамлаб, кетма-кет икки мавсумда: 2022/23 ва 2023/24 йилги мавсумларда чемпионликни қўлга киритди. 

"Ал Холидия" 2024/25 йилги Баҳрайн Қироллик кубоги соҳибига айланган. Маҳаллий чемпионатда эса иккинчи ўринни эгаллади. Али Ашур жамоа бош мураббийи ҳисобланади. 43 ёшли баҳрайнлик мураббий фаолияти давомида асосан, маҳаллий клубларни бошқарган. Шунингдек, Кувайтда бир йил ишлаган. Али Ашур ўзи ишлаган деярли барча клубда мамлакат чемпионлигини қўлга киритган.

"Ал Холидия" ёзда сезиларли кучайишга эришди. Жамоанинг энг қимматбаҳо футболчиси марокашлик Аюб Ал Амлуд ҳисобланади (800 минг евро). 31 ёшли ўнг қанот футболчиси ёзда Эроннинг "Персеполис" клубидан келиб қўшилди. Шунингдек, "Сидней"дан Анас Уаҳим жалб этилди. Қолаверса, таркибдаги кўпгина футболчилар Баҳрайн терма жамоаси аъзоси ҳисобланади.

Қуръа ҳақида "Андижон" бош мураббийи ва футболчиларнинг фикри қандай?

"Андижон" клуби матбуот хизмати бош мураббий Максим Шацких ва бир неча жамоа аъзоларининг ОЧЛ-2 қуръаси ҳақидаги фикрларини эълон қилди.

Максим Шацких: "Қуръани ҳеч қачон кўрмайман. Чунки барибир ҳамма билан ўйнаш керак. Бу ерда кучсиз жамоалар бўлмайди. Бизнинг гуруҳда “Ал-Аҳли” топ жамоа ҳисобланади. Шунингдек, Баҳрайн ҳамда Туркманистон чемпионлари ҳам бор. Яхши жамоалар. Бу кучли гуруҳ. Мана, энди биз ўз кучимизни синаб кўрамиз".

Эржан Токотаев: “Яхши, тенг кучли гуруҳ, яққол фаворит йўқ. Ҳамма жамоалар чиройли футбол намойиш этишга қодир. Юқори натижа кўрсатиш умидида турнир бошланишини кутмоқдамиз”.

Ислом Маматказин: “Қуръани биз ўйлагандек ўтди, деса ҳам бўлади. Жамоамиздаги кўплаб футболчилар билан бирга гуруҳимизда “Ал-Насср” бўлишини хоҳлагандик. Худо хоҳласа, яхши ўйинлар кўрсатиб, гуруҳдан чиқсак плей-оффда “Ал-Насср” билан ўйнаш насиб қилади, деб ўйлайман”.

Отабек Жўрақўзиев: “Қуръага келадиган бўлсак, зўр жамоалар тушди, деб ўйлайман. Қатарда чемпионат энди бошланди. Рақибимиз битта учрашув ўтказди. Туркманистон чемпионати давом этмоқда, рақибимиз ҳали бирорта учрашувда мағлуб бўлгани йўқ. Баҳрайн чемпионатига келсак, улар ҳам мамлакатнинг гранд клубларидан бири ҳисобланади. Бизни олдинда жуда ажойиб учрашувлар кутиб турибди. Бўлажак ўйинларда муҳим ғалабаларни қўлга киритиб, кейинги босқичга чиқиш учун ҳаракат қиламиз ҳамда мухлисларимизни хурсанд қиламиз”.

Бектемир Абдуманнонов: “Қуръада Саудия клуби - “Ал-Насср” тушишини кутгандим. Яхши рақиблар бўлди. Гуруҳдан чиқишимизга имкониятимиз кўпроқ. Қатар, Баҳрайн ва Туркманистонни яхши жамоалари рўбаро бўлдилар. Муносиб ўйинлар кўрсатиб, кейинги босқичга чиқишга ҳаракат қиламиз. Балки кейинги босқичларда “Ал-Насср” билан тўқнаш келиб қолсак керак. Роналдуга қарши ўйнаш ниятимиз  бор. Гуруҳда максимал очколарни тўплашга бор кучимизни ишга соламиз. Ҳаммаси яхши рақиблар. Очколарни кўпайтиришга ҳаракат қиламиз. Балки финалгача борармиз. Омад келса кўп нарса ҳал бўлиб кетиши мумкин. Мухлисларимизни хурсанд қилмоқчимиз”.

"Андижон" клуби ўрин олган гуруҳнинг Осиё Чемпионлар лигаси-2 турниридаги тақвими

1-тур

17 сентябрь (чоршанба)

“Аркадағ” (Туркманистон) - “АНДИЖОН” (Ўзбекистон)

“Ал-Аҳли (Қатар) - “Ал-Халдия” (Баҳрайн)

---------------------------------------------------

2-тур

1 октябрь (чоршанба)

“АНДИЖОН” (Ўзбекистон) - “Ал-Аҳли” (Қатар)

“Ал-Халдия” (Баҳрайн) - “Аркадағ” (Туркманистон)

---------------------------------------------------

3-тур

22 октябрь (чоршанба)

“АНДИЖОН” (Ўзбекистон) - Ал-Халдия” (Баҳрайн)

“Ал-Аҳли” (Қатар) - “Аркадағ” (Туркманистон)

---------------------------------------------------

4-тур

5 ноябрь (чоршанба)

“Аркадағ” (Туркманистон) - “Ал-Аҳли (Қатар)

“Ал-Ҳалдия” (Баҳрайн) - “АНДИЖОН” (Ўзбекистон)

---------------------------------------------------

5-тур

29 октябр (чоршанба)

“Ал-Халдия (Баҳрайн) - “Ал-Аҳли” (Қатар)

26 ноябрь (чоршанба)

“АНДИЖОН” (Ўзбекистон) - “Аркадағ” (Туркманистон)

---------------------------------------------------

6-тур

24 декабрь (чоршанба)

“Аркадағ” (Туркманистон) - “Ал-Халдия” (Баҳрайн)

“Ал-Аҳли” (Қатар) - “АНДИЖОН” (Ўзбекистон)

Оқил Абдубарноев тайёрлади.