Жавлон Салаҳитдинов: "Бакаев ҳам номзодлар орасида бор эди. Аммо..."

Бу борада  "Сўғдиёна" директори Жавлон Салаҳитдинов сайтимизга ўз муносабатини билдирди.

- Дастлаб яқинда жамоада амалга оширилган мураббийлар ўзгариши ҳақида...

- Ҳамма кўрди уйдаги 3та учрашувимизда 1 очкогина ишладик. "Олимпик" билан бир киши кўп бўлиб ўйнаганимизга қарамай ғалаба қозона олмадик. Наманганда йирик ҳисобда мағлуб бўлдик. Умуман олганда натижа яхши бўлгани йўқ. Истеъфогача 4та турдан 3тасини мезбон сифатида қабул қилдик. Шу боис мураббийлар штабини вазифасидан озод қилдик. Иван Бошкович билан алоқага чиқдик. Тез кунда келишувга эришилди. 

- "Навбаҳор" билан ўйиндан олдин "Сўғдиёна" Улуғбек Бакаевни ортга қайтараётганди. Бу нима учун амалга ошмади?

- Тўғри. Улуғбек Бакаев билан ҳам алоқага чиққандик. Ҳаммаси гаплашилди, дея оламан. У бироз вақт беришини сўради. Кутдик, Намангандаги ўйиндан кейин яна алоқага чиқдик. Бу пайтда "Бухоро"га кетишини маълум қилди. 

- Ёрқин Назаров ўтган йили мавсум тугашига 2 тур қолганда жамоани қабул қилиб олганди. Янги мавсумга таркибни мураббий йиғди, тайёрлади. Шу нуқтаи назардан Ёрқин Назаровнинг ишини қандай баҳолаш мумкин?

- Таркибни ўзлари жамладилар. Ҳамма ташкилий ишларни қилиб бердик. Тўғри қишда бироз муаммо бўлди. Умуман бу пайтда ҳамма бир хил ҳолатда эди. Туркияда ҳам йиғин ўтказдик. Ҳамма имкониятни берганмиз. Билмадим ҳужумчиларимиз кучсизлик қиляптими, вазиятлардан фойдалана олмаяпмиз. 

-  "Сўғдиёна" учун бу йил пасайиш мавсуми бўладими? Умуман клуб бунга тайёрмиди?

- Энди 6та тур ўтди. Ўрта ўринлардаги жамоалар билан ўртада катта фарқ йўқ. Битта ғалабадан сўнг йигитларни ўзига бўлган ишончи ортади. Ғалаба керак. 2022 йил август ойидан бери ғалаба қозонганимиз йўқ. 

- Ёзги трансферлар вақтида янги мураббийнинг талабига кўра таркибда ўзгаришлар бўладими?

- 3-4та ўзгаришлар қиламиз. Ҳужумда оқсаяпмиз. Ишлашда давом этамиз. 

Абдулазиз Искандаров