Артета "Реал"да пайдо бўлиши мумкин! Бунинг учун икки омил тўғри келиши керак

"Topskills Sports UK" маълумотларига кўра, "Арсенал"нинг ҳозирги бош мураббийи Микель Артета яқинларига шу мавсумда ҳам Англия Премьер-лигасини, ҳам Чемпионлар Лигасини юта олса, клубни тарк этишга тайёр эканини айтган.

Хабар қилинишича, Артета бу ютуқларни "Арсенал" бош мураббийи сифатидаги спорт амбицияларининг энг юқори нуқтаси деб билади ва уларга эришганидан кейин ўзини бошқа клубда синаб кўришни режалаштирмоқда.

Бу сценарийда Артетани исташи мумкин бўлган асосий клублардан бири — Мадриднинг "Реал"и. "Қироллик клуби" уни диққат билан кузатиб боряпти ва клуб учун узоқ муддатли мураббий сифатида кўряпти.

Артетанинг "канонирлар" билан шартномаси 2027 йилнинг ёзигача амал қилади ва ҳозирча уни узайтириш бўйича ҳеч қандай музокаралар бўлмаган.

Испаниялик мутахассис 2019 йилнинг декабрида "Арсенал" бош мураббийи этиб тайинланган. Шундан бери у клуб бошқарувида 334 ўйин ўтказиб, 207 та ғалаба, 57 та дуранг қайд этган ва 70 марта мағлуб бўлган.

"Қизил-оқлар" жорий мавсум Премьер-лигада 1-ўринни эгаллаб турибди ва узоқ кутилган чемпионликка яқин турибди. Шунингдек, жамоа Чемпионлар Лигасининг 1/8 финалида иштирок этмоқда ва у ерда Леверкузеннинг "Байер"и билан тўқнаш келади.