"Арсенал" Бастони трансферига кўз тикди: "Интер" салмоқли нарх айтди

"Caught Offside" маълумотларига қараганда, инглиз клуби раҳбарияти 26 ёшли италиялик футболчининг ўйин хусусиятлари Микель Артета қўл остидаги жамоанинг тактик моделига жуда мос келишига ишонмоқда.

"Интер"дагилар футболчи бўйича таклифларни эшитишга тайёр, бироқ келишув учун бошланғич нарх камида 90-100 млн евро деб белгиланган. Бастонининг миланликлар билан шартномаси 2028 йилнинг ёзигача мўлжалланган, бу эса италияликларнинг музокарадаги позициясини кучайтиради.

Ҳимоячи "Интер"да 2017 йилдан бери ўйнаб келади — у ўшанда "Аталанта"дан 31 млн еврога ўтган. У жорий мавсум нафақат ҳимояда ишончли ўйин кўрсатмоқда, балки самарадорлиги билан ҳам ажралиб турибди: барча турнирларда 33 ўйинда 2 та гол ва 6 та голли узатма. Transfermarkt маълумотларига кўра, ўйинчининг бозордаги нархи 80 млн евро деб баҳоланмоқда.

Шу орада "Арсенал" Англия чемпионатида ишончли равишда пешқадамлик қилмоқда. Навбатдаги ғалабадан сўнг "тўпчилар" очколарини 64 тага етказиб, турнир жадвалида биринчи ўринни мустаҳкамлади.

Аввалроқ Бастони "Ливерпул"нинг трансфер бозоридаги устувор мақсадига айлангани ҳақида хабар берилган эди.