АПЛ. "Челси" ва "Вест Хэм" футболчилар ўртасидаги оммавий муштлашув сабаб йирик миқдорда жаримага тортилди

Жанжал қандай бошланди?

Учрашувнинг 96-дақиқасида Адама Траоре ва Марк Кукурелья ўртасидаги зиддиятдан сўнг бир гуруҳ футболчилар иштирокида муштлашув бошланиб кетди. Вазиятларнинг бирида Жан-Клер Тодибо икки қўли билан Жоао Педронинг бўйнидан бўғиб олди.

Ўйиннинг бош ҳаками Энтони Тэйлор дастлаб Траоре ва Педрога сариқ карточка кўрсатди. Шундан сўнг у ВАР ҳакамларининг маслаҳати билан вазиятни мониторда кўриб чиқди ва Тодибони майдондан четлатди (қизил карточка).

FA қарори ва жарима миқдори:

Ассоциациянинг баёнотида шундай дейилади:

"Мустақил тартиб-интизом комиссияси 2026 йил 31 январь куни Премьер-лига доирасидаги ўйиндаги оммавий тартибсизлик учун "Челси" ва "Вест Хэм Юнайтед" клубларини жаримага тортди.

"Челси" ўз футболчиларининг тахминан 95-дақиқада номақбул ва иғвогарлик ҳаракатларини қилмаслигини таъминлай олмагани тан олинди. "Вест Хэм Юнайтед" ҳам шу вақт ичида ўз ўйинчиларининг номақбул, иғвогарлик ёки тажовузкор хатти-ҳаракатларининг олдини олмаган.

Кейинчалик ҳар икки клуб ўзларига қўйилган айбловларни тан олди. Тинглавдан сўнг комиссия "Челси"га 325 000 ва "Вест Хэм"га 300 000 фунт стерлинг миқдорида жарима солди".

АПЛ раҳбарияти майдондаги бундай тажовузкор хатти-ҳаракатларга нисбатан муросасиз муносабатда бўлишда давом этмоқда.