Анвар Ҳожимирзаев: "Бу йил 15 тадан кам гол урмоқчи эмасман"

Хусусан, ўтган йили Суперлигада тўпурар бўлишга интилган Анвар Ҳожимирзаев ҳам илк бор терма жамоа либосида тўп тепди. Ҳужумчи бугундан "Динамо" ихтиёрига қайтди ва янги мавсумга тайёргарликни давом эттирмоқда. 

- Ўзбекистон терма жамоасида биринчи маротаба машғулот олиб бордингиз ва ўртоқлик учрашувида майдонга тушдингиз. Бу қандай ҳиссиётларни берди?

- Терма жамоада ўйнаш ўзгача бўлди. Қайсидир маънода босимни ҳис қилар экансиз. Ўртоқлик учрашуви бўлса ҳам катта масъулият, бошқача ишонч елкангизда туради. Киришиб кетиш қийин бўлгани йўқ. Уларнинг барчаси билан ака-укамиз. 

- Йиғин давомида мураббий ўзгаришини жамоа қандай қабул қилди?

- Албатта, кутилмаган ҳолат бўлди дея оламан. Сречко Катанецни ҳам ҳали кўрмаган эдим. Тимур ака билан ишладик. Ким мураббий бўлса ҳам мақсадимиз сари интилишда давом этишимиз керак. Бу футболда бўлиб турадиган ҳолат.  

- Терма жамоадаги юкламалардан сўнг "Динамо"га мослашиш қийинчиликлар туғдирмаяптими?

- Бугун клуб сафига қўшилдим. Бир кунлик хордиқдан сўнг чемпионатга жиддий тайёргарлик олиб боряпмиз. Мақсадимиз ўтган йилгидан катта. Мухлисларни муносиб натижалар билан хурсанд қилишимиз керак. 

- Суперлигани кетма-кет иккинчи йил "Навбаҳор"га қарши бошлайсизлар...

- Ўтган йили "Навбаҳор"га 3:1 ҳисобида мағлуб бўлгандик. Жорий мавсумни ғалаба билан бошлашни истаймиз ва бунинг учун жамоамизда иштиёқ икки карра юқори. Қуръада ким тушишини аҳамияти йўқ эди. Тўғри келгани билан ўйнаймиз. 

- 2025 йилда нечта гол урмоқчисиз?

- 15 тадан кам гол урмоқчи эмасман. Йилни тўпурар сифатида якунлашни хоҳлайман. 2024 йилда бу маррага озгина етмай қолганди.