"Ювентус" ва Влахович янги шартнома борасида музокараларни бошлади: Туринликларнинг таклифи ҳужумчи учун биринчи ўринда

Аввалроқ 26 ёшли сербиялик футболчи фаолиятини Турин клубида ёки "Барселона"да давом эттирмоқчи эканлиги хабар қилинган эди.

Томонларнинг позицияси ва Ди Марцио маълумоти:

Таниқли инсайдер Жанлука Ди Марцио берган маълумотларга кўра, биринчи учрашув ҳар икки томон ҳам ҳамкорликни давом эттиришга очиқ эканлигини кўрсатди. Гарчи якуний қарор ҳали қабул қилинмаган бўлса-да, томонлар келишувга эришиш йўлларини изламоқда ва яқин орада яна учрашишни режалаштирмоқда.

"Ювентус" футболчининг шартномасини фақат ўз шартлари асосида узайтиришга тайёр эканлигини аниқ билдирди. Влахович эса, ўз навбатида, унинг учун биринчи ўринда айнан туринликларнинг таклифини кўриб чиқиш устувор вазифа эканлигини таъкидлади.

Бошқа клублар билан келишув йўқ:

Таъкидланишича, сербиялик футболчининг амалдаги шартномаси якунига етиб бораётганига қарамай, у ҳозирча ҳеч қайси бошқа жамоа билан ҳеч қандай келишувга эришмаган. Шу сабабли Душан вазиятни отаси ва музокаралардаги бошқа вакиллари билан муҳокама қилиб, яқин кунларда "Ювентус" мутасаддилари билан яна музокаралар столига ўтиради. Ҳар икки томон айни пайтда янги битим бўйича молиявий консенсусга эришиш учун саъй-ҳаракатларни амалга оширишга тайёр.