Юртимизга Германия Бундеслигасида фаолият юритаётган мутахассислар ташриф буюришди
08 фев 2018 11:25
Янгиликлар

Юртимизга Германия Бундеслигасида фаолият юритаётган мутахассислар ташриф буюришди

Аввал хабар берганимиздек, ЎФА 1-вице-президенти Умид Аҳмаджонов ОФК президенти Шайх Салмон бин Иброҳим ал-Халифа билан учрашув чоғида ОФКнинг етук мутахассисларини юртимизга олиб келиш ва уларнинг тажрибаларидан фойдаланиш борасида келишувга эришганди.

Ана шу келишувга кўра, бугун 8 февраль куни юртимизга Осиё футбол Конфедерациясининг мутахассислари Жоерн Шлим ва Марсель Исакович ташриф буюришди. Бу мутахассислар аслида Германия Бундеслигасида фаолият юритишади. ОФК футбол клубларининг фаолиятини ривожлантиришда Европа тажрибасидан фойдаланиш мақсадида Жоерн Шлим ва Марсель Исакович каби юқори малакали мутахассисларни Осиё клубларига жалб қилмоқда.

ОФК томонидан юборилган мутахассислар 12 февралга қадар мамлакатимизнинг 4та клуби - «Пахтакор», “Локомотив”, “Бунёдкор” ва “Динамо” Самарқанд клубларида бўлишади. Улар бу клуб вакилларининг лицензиялаш борасида амалга ошираётган чора-тадбирлари билан яқиндан танишиб, уларга ўзларининг амалий маслаҳатларини беришади.