Ямаль ва жамоадошлари Фликка қулоқ солмаяпти(ми)?! Бундай камбэклар "Барселона"нинг устунлиги эмас, заифлигини билдиради

"Барселона" – ёш болалар жамоаси. Флик шогирдларини энагаларига, яъни уларнинг оналари, аёллари ва қиз ўртоқларига ишониб топширади. Бироқ Левандовски ва Ямаль яна бирга бир майдонда бўлганида, мураббий уларнинг болаларча бошқариб бўлмас энергияси қаршисида ожиз қолади. Ханси "Суғур куни" фильми бош қахрамонидек, фақатгина болалар боғчасида ишлайди. Куни-кеча Левандовски 37 ёшни қарши олди, унинг байрам тортида эса қуйидаги жумла бор эди: "Ташқи кўринишим 15 ёшдагидек, мен ўзимни 12 ёшлидек ҳис қиляпман ва лекин 10 ёшли боладек тутяпман. Бу нарса мени 37 ёшга айлантиряпти".

Биринчидан, Левандовски қанчалик яхши спорт формасини сақлаб қолмасин, 15 ёшли боладек эмас. Иккинчидан, ўзини ундан ҳам ёш боладек ҳис қилаётгани ҳақидаги икки пункт, бу унинг жамоаси учун чинакам чақириқ. Каталониялик футболчилар ўзларини 10 ёшли болалардек тутишмоқда ва 12 ёшдаги "безори болалардек" кўринишни истаяпти. Ла Лига биринчи турида "Мальорка" таслим этилгач, Флик жамоасини очиқчасига танқид остига олди. Кўпчилик германиялик мураббий қайсидир маънода камтарлик қиляпти, деб ўйлади, аммо ўйин картинаси Чемпионлар Лигаси ғолибига "Барселона" ўсмаётганига ишона қилган бўлса ажаб эмас.

Ханси "Мальорка" футболчиларига етарлича ҳурмат кўрсатмаган шогирдлари билан жиддий суҳбат қуришини айтди. Фаворитдан омад юз ўгирмади ва жамоа вазиятдан ғолиб бўлиб чиқди. Худди ёш болалардагидек безорликдан кейинги тарбиявий суҳбатнинг ижобий натижаси деярли кўринмади — футболчилар Фликнинг сўзларини унчалик жиддий олмаган кўринади. Танаффусгача "Барселона" "Леванте"дан иккита тўп ўтказиб юборди. Улар айнан Флик тақиқлаган ишга қўл урди. Ханси асабийлашмоқда.

"Леванте" ҳимоясига уюштирилган мунтазам босим голга олиб бормади, "Барселона" эса рақибнинг икки аниқ зарбасидан 2 та гол ўтказиб юборди. Ромеро аввалига Кубарси ва Араухони доғда қолдирди, бўлим охирида эса қарши ҳужум вақтида тўп жарима майдончаси ичида Бальденинг қўлига тегди ва мезбонлар пенальтидан фарқни иккитага оширишди. "Леванте" ғалабани ушлаб қола олмади, лекин Фликка нафақат очколар, балки ўйиннинг ўзи ҳам муҳим ҳисобланади. "Барселона" футболчилари аввалига 3 та гол уриб, кейин майдонда ўзи истаган қилиқларини қилиши ва балки бўшаши мумкин эди. Лекин жамоа бундай осон йўлни танламайди.

"Ремонтадалар қироллари" – аслида мақтов эмас

Охирги вақтларда "Барселона" – ремонтада қиролларига айланаётган, унинг футболчилари эса – Ла Лигада қийин вазиятлардан чиқиб кетиш бўйича устаси фаранг бўлиб кетмоқда. Ўйинга қайтиб, салбий ҳисобни ижобий натижага ўзгартириш, жамоа илк дақиқалардан ўйинда бўлмаганини билдиради. Каталонияликлар Ла Лига доирасида иккита тўп фарқи билан ҳисобда ортда қолаётган тўртта ўйинида ғалаба қозонди. "Леванте"дан аввал бу ҳолатга "Реал", "Сельта" ва "Атлетико" жамоалари тушганди. Яъни март ойидан буён тўртта шунга ўхшаш вазият кузатилган. Эътиборли томони, Симеоне жамоаси дарвозасига 72-дақиқадан бошлаб, ўйин охиригача тўртта тўп урилган.  

Бундай ўйинлардан кейин футболчилар истаса-истамаса ҳар қандай вазиятдан чиқиб кета оламан, деб ўйлай бошлайди. Натижада, Флик бор кучи билан эришмоқчи бўлаётган ҳимоядаги концентрация бўлиши деярли имконсиз. Ҳар бир чизиқ вакили эпизодларда охиригача югурмаса, голкипер ҳамма вазиятда ҳам қутқара олмайди – Гарсия "Леванте"дан ўтказиб юборилган ҳар икки голда ҳам бош айбдор эмас. Камбэклар "Реал" ва "Атлетико"га қарши учрашувларда ҳам амалга оширилгач, "Барселона" футболчилари ўзларини буткул бошқа даражада ҳис қила бошлашди. "Интер"дан учралган мағлубият жамоа уйғониши учун етарли бўлмади.

2015 йилларда "Барселона" мухлислари азалий рақиби "Реал" охирги 10 йилда фақат бир бор Чемпионлар Лигасида зафар қучганини бот-бот тилга олар, ўз севимлилари эса бу орада тўрт марта бош совринни боши узра кўтаргани билан ғурурланишарди. Кейинги ўн йилликда эса "Барса" бирор марта финалда майдонга тушмади, "Реал" эса яна 5 та кубокни клуб музейига олиб кетди. "Барселона" бутун тарихида шунча ғалабага эришган. Флик ҳақ, каталонияликларнинг жиддий муаммоси мавжуд: Чемпионлар Лигасида ғалаба қозониш учун футболчилар қатор зарарли одатларидан воз кечиши керак.

"Сельта" ва "Леванте"га қарши ўйинлардаги ремонтада "Реал"ни Ла Лига жадвалида ортда қолдириш имконини бермоқда. Ички кубокларда зафар қучиш ёқимли, мухлислар эса треблдан хурсанд. Бироқ "Барселона" молиявий муаммолари масштаби анча катталиги барчага маълум. Уларга нафақат ички мусобақаларда ғолиб бўладиган, чиройли ўйин кўрсатадиган, балки максимал фойда олиб келадиган жамоа зарур. Бунинг учун Чемпионлар Лигасида ғолиб бўлиш талаб этилади, у ерда эса босимга чидамлироқ ва "Барса" ҳимоясидаги хатолардан "Леванте"дан кўра унумлироқ фойдалана оладиган жамоалар бор. 

Ямаль ва унинг дўстлари Фликни ҳурмат қилмайди

Педагогик жиҳатдан ўйинчоқларини яна ёйиб ташлаган, лекин ўйнаб бўлгач, уларни йиғиштиришга қарашиб юборган болани уришиш нотўғри бўлади. Бошқа томондан ҳали тўлиқ шаклланиб улгурмаган шахсиятга унинг ўзбошимчалиги эътиборсиз қолиши мумкинлигини кўрсатиш ҳам нотўғри бўлади. Флик анча қийин вазиятда қолди. Унинг қўл остида жуда кучли, лекин нафақат ўзгармаётган, балки ўзгаришни истамайдиган жамоа бор. Куни-кеча Ямаль "Леванте" билан учрашув вақтида ноўрин ҳаракатлардан ташқари, рақиб жамоа мухлисларига қарата туфлади. 

Афсуски, испаниялик Мессини эмас, Неймарнинг қилиқларини кўчираётгандек. Ваҳоланки катта футболда айнан Лионель узоқ вақт чўққида тургани ҳеч кимга сир эмас. Лео Ла Лиганинг биринчи ва иккинчи турлари орасидаги танаффусда Монакога кўнгилҳушлик қилиш учун бориб келмаган. Тўғри, қайсидир маънода 18 ёшли йигитча учун соч турмаги ва қизлар ҳаётининг бир бўлаги бўлиши табиий жараёндир, бироқ футболчи етарлича ухламаслигининг ўзи жароҳатлар сериясига сабаб бўла олади. Месси эса бор эътиборини ўйинга қаратган ва айнан футболдан завқ олган. Ямалнинг саккиз зарбасидан фақатгина иккитаси мўлжалга аниқ борди. Педрининг голидаги ассистга ҳам юқори баҳо бериб юбориш қийин, сабаби у вазиятдаги шедеврда Ламиннинг ҳиссаси бир мунча кам.

Айнан Ямалнинг узатмасидан кейин рақиб ҳимоячиси тўпни дарвоза тўрига буриб юборгани омадли ҳолат, лекин 91-дақиқадаги гол эвазига қўлга киритилган бу каби ғалаба — ғурурланиш учун асос эмасдек. "Барселона" иқтидорлари, мураббийга ҳавас билан қарар, лекин унинг қарорларини ҳурмат қилмаяпти. Буни муҳим учрашувларда тўпсиз ўйиндаги кўплаб хатолардан кўриб олиш қийин эмас. Топ даражадаги жамоа мураббийлар штаби меҳнатини қадрлайди ва ўтган мавсум ЕЧЛда бўлгани каби "Интер"га ютқазмайди, Испаниянинг ўзида турли даражадаги рақибларга иккита тўп фарқи билан олдинга ўтиб олиш имконини бермайди. Камбэклар яхши, лекин улар мунтазам равишда бўлиши ёмон сигнал. "Барселона" камбэкларга ҳожат қолдирмай ғалаба қозонишни ўрганса, катта жамоага айланади.

Флик учун энг аламлиси у ўйинчиларига юз маротабалаб қаерда хато қилинаётганини тушунтириб, майдон четидан ҳимоячиларга кўп бор овозини борича у ёки бу вазиятда қандай ҳаракат қилиш зарурлиги бўйича кўрсатмалар берди. "Барселона" устози "Бенфика" билан ўйиндаги ғалабадан кейин (4:5) дуранг натижа учун ҳам хурсанд бўлишини айтганди. Германиялик ўша баҳсда ҳимоядаги хатолар оқибатида Павлидис биринчи бўлимнинг ўзида хет-трик расмийлаштирганини ҳазм қилиши қийин бўлганди. Рафинья ўша куни жамоани қутқариб қолганди. Бироқ сюжет ва хатолар такрорланаверса – Испания Кубогида "Атлетико"га қарши 4:4ни ҳам ёдга олинг, ёрқин камбэклар "Барселона"нинг ҳужумкор ва томошабоп ўйинининг устунлиги эмас, жамоанинг заифлигини билдиради.

Омонжон Тўхтамирзаев тайёрлади