Хайрулла Каримов: “Нефтчи” кўпроқ стандарт вазиятларига эътибор қаратса керак”

- Бир ойлик танафусдан кейинги илк учрашув ҳеч бир жамоа учун осон ўтмаслиги аниқ. Айниқса, водийда тўп тепиш меҳмон жамоаларга доимо қийинчилик туғдириб келади. Давралар оралиғида “Нефтчи” ўз сафини тажрибали футболчилар билан тўлдириб олди. Шунингдек, жамоа таркибида курашга чанқоқ ёшлар ҳам талайгина. “Бунёдкор” ҳақида эса ортиқча гапириб ўтирмоқчи эмасман. Шунчаки, жамоа чемпионлик учун курашаётганини эслаш етарли. Қисқа қилиб айтадиган бўлсам, иккала жамоани ҳам оғир ўйин кутяпти.

Фикримча, “Нефтчи” кўпроқ стандарт вазиятларига эътибор қаратса керак. Шукурали Пўлатов ва Акмал Ҳолматовдек маҳорат эгалари исталган нуқтадан жарима зарбаларини яхши бажара олишини яхши биламиз. Таркибимизда битта жиддий йўқотиш бор. Шораҳмедов сариқ карточкалар туфайли баҳсни ўтказиб юборади. Ўйлайманки, унинг ўрнида ҳаракат қиладиган футболчи ҳам яхши ҳаракат қила олади. Ярим йиллик танаффусдан кейин яна қадрдон жамоамга қайтдим. Нималар ўзгарди? “Бунёдкор” – профессионал клуб! Жамоадаги ташкилий ишлар яна ҳам юқори савияга чиққан. Жамоадаги ёшлар ярим ёшга улғайишган ва шунга яраша тажрибалари бойиган, - дейди Хайрулла Каримов.

"Бунёдкор" матбуот хизмати