Винисиус мухлисларнинг муносабати туфайли "Реал"даги келажагига шубҳа қилмоқда

"Реал"нинг қанот ҳужумчиси Винисиус Жуниор клуб билан ҳамкорликни давом эттиришга иккиланмоқда. Бразилиялик футболчи илк бор "оқ кийимлилар" мухлисларининг бир қисми уни қўллаб-қувватламаётганини ҳис этди. Бу ҳақда El Chiringuito хабар бермоқда.

Манба маълумотига кўра, ҳозирда 25 ёшли футболчи "Қироллик клуби" билан 2027 йил ёзида тугайдиган меҳнат шартномасини узайтириш масаласида аниқ бир қарорга кела олмаяпти.

Эслатиб ўтамиз, "Реал" мухлислари Ла Лиганинг "Севиля"га қарши ўйинида (2:0) Винисиус алмаштирилгандан сўнг, у майдонни тарк этаётганда унга нисбатан ҳуштак чалишган.

Жорий мавсумда бразилиялик футболчи барча мусобақаларда 24 та ўйинда иштирок этиб, 5 та гол урди ва 8 та голли узатма берди.