Transfermarkt ва Championat.asia Ўзбекистон Суперлигасининг март ойидаги энг яхши мураббийи ва футболчисини аниқлади
31 мар 19:00
Янгиликлар

Transfermarkt ва Championat.asia Ўзбекистон Суперлигасининг март ойидаги энг яхши мураббийи ва футболчисини аниқлади

Овоз беришда Championat.asia ходимлари ҳамда Transfermarkt'нинг рус бўлими раҳбари Георгий Лекарев ва меҳмон эксперт – "Спорт" телеканали шарҳловчиси Отабек Жўраев иштирок этди.

Овоз бериш якунларига кўра ОКМК бош мураббийи Миржалол Қосимов март ойида Суперлиганинг энг яхши мураббийи деб топилди. Унинг бошчилигида жамоа Ўзбекистон чемпионатининг дастлабки уч турида учта ғалабани қўлга киритди, тўплар фарқи 7:2 ни ташкил этди. Ҳозирги вақтда ОКМК Суперлигада пешқадамлик қилмоқда. Қосимов 47 фоиз овоз тўплади, иккинчи ўринни 35 фоиз билан Вадим Абрамов ("Динамо"), учинчи поғонани эса 18 фоиз овоз билан Илёс Зейтуллаев ("Бунёдкор") эгаллади. Абрамов ва Зейтуллаев жамоалари уч ўйинда еттитадан очко тўплашди.

Суперлиганинг март ойидаги энг яхши ўйинчиси "Бунёдкор" ҳужумчиси Луис Качорри бўлди. Италия фуқаролигига ҳам эга бўлган 27 ёшли албаниялик футболчи уч турда тўртта гол уриб, 65 фоиз овозга эга бўлди. Ўзбекистон чемпионатининг энг яхши тўпурарлар рўйхатида ҳозирда Качорри пешқадамлик қилмоқда. Иккинчи ўринни уч ўйинда иккита тўп киритган ОКМК вингери Нодир Абдураззоқов (17 фоиз) ва учинчи поғонани уч ўйинда дарвозасини дахлсиз сақлаган "Динамо" посбони Равшан Ягудин (12 фоиз) банд этди.