Transfermarkt ва Championat.Asia апрель ойининг энг яхшиларини аниқлашди

Ушбу ҳамкорлик доирасида икки сайт биргаликда ҳар ой Суперлиганинг энг яхши мураббий ва энг яхши футболчисини аниқлаб келмоқда.

Овоз бериш жараёнида Championat.Asia сайти журналистлари ҳамда Transfermarkt порталининг рус бўлими ходимлари иштирок этишди, таклиф этилган эксперт сифатида Ўзбекистон терма жамоаси собиқ футболчиси, таниқли мутахассис Бахтиёр Ашурматов қатнашди.

Овоз бериш натижасига кўра энг яхши мураббий сифатида Максим Шацких тан олинди. Унинг қўл остида "Пахтакор" Суперлиганинг 4та учрашувида 4та ғалабага эришди ва пешқадамлар сафига қайтди. Шацкихга сўралганларнинг 76% овоз берди.

Ой футболчиси сифатида "Пахтакор" сардори Драган Черан эътироф этилди. У апрель ойидаги 4та учрашувда 6та гол урди. Черанга 52% овоз берилди, унинг энг яқин таъқибчилари - Ҳусниддин Алиқулов ("Насаф") ва Остон Ўрунов ("Навбаҳор") - 16% дан овоз олишди.