Тошкентда Германия методикаси асосида "JFL" футбол мактаби очилади

Мактаб 3та ёш тоифасида иш олиб боради. Булар, U-11 (2006), U-10 (2007-08) ва U-9 (2009-10). Синфларда, Германияда бўлгани каби, битта гуруҳда икки ёш тоифасидаги ёш футболчилар қатнашандилар. Ҳар бир гуруҳда 23 нафар бола бўлади. 20 нафар футболчи шартнома асосида, 3 нафари эса мактаб фонди асосида тарбия топади.

Европа методикасига кўра, бу ерда ҳам аввало болани етук инсон бўлиб етишишига асосий урғу берилади. Мактабда фаолият олиб борадиган мураббийлар март ойида Германияда малакаларини ошириб қайтадилар. Ёз фаслида эса улар иккинчи маротаба Германияга ташриф буюрадилар. Бу пайтда германиялик мураббийлар уларнинг ўрнига Тошкентдаги машғулотларни ўтказадилар. Ҳар бир машғулотда мактабнинг шифокори иштирок этиб боланинг саломатлигига маъсул бўлади. Ундан ташқари клубда дарвозабонлар мураббийи фаолият олиб боради. 

"JFL-Tashkent"да футбол сир асрорларидан ташқари, инглиз ва немис тиллари мукаммал ўргатилади. Мактаб фанлари жиддий назорат қилинади. 

Режага қўра 15 февралдан қабул бошланади. 

Даврон Қориев мактабнинг 2003-04 йилларда таваллуд топган футболчилари сафидан жой олди. 

"Кичик фарзандим Германиянинг "JFL-Schlotheim" жамоаси аъзосига айлангач, менда мазкур мактаб методикаси асосида Тошкентда филиал очиш нияти пайдо бўлди. Шунинг учун яқинда бир ой давомида Шлотаймда бўлиб, мактаб структураси билан яна бир бор яқиндан танишдим. Ўзим учун жуда кўп жиҳатларни кашф этдим. Энди уни Ўзбекистонда амалга ошириш қолди. Ҳозирда ҳужжатли ишлар билан шуғулланаяпмиз. Лойиҳамиз иш бериши билан унинг вилоятлардаги филиалларини очамиз. Ундан ташқари, 3-6 ёшдаги ёш болачалардан иборат тўгаракларни очиш орқали, уларни мактабимиз учун тайёрлаб борамиз. Бунинг учун яхши базага эга бўлиш арафасида турибмиз. Ҳозирча база сир бўлиб турсин. Аммо у ердаги шароитлар ота-оналарни қувонтириши аниқ", - дейди компания асосчиларидан бири Дилшод Қориев.

- Мактабнинг бошқа футбол тўгаракларидан фарқи нимада бўлади?

- Европада фарзандингизни бирон бир клубга олиб борсангиз, улар уни футболчи бўлиб етишишига 100% кафил бўлмайди. Аммо, фарзандингизни бошқа фанлардан қолиб кетмаслиги, бир кун келиб бошқа касбни танламоқчи бўлса қийинчиликсиз ўша сохасига киришини ҳам таъминлайди. Боиси улар футболчисига аввало ўзининг фарзанди сифатида қарайди. Биз ҳам шу методикани қўллашни ният қилаяпмиз. Аввало бизга келган болакай футболдан ташқари, мактабнинг бошқа фанларини ҳам мукаммал билсин. Дейлик 16 ёшли боладан футболчи чиқмади. Аммо у камида немис ва инглиз тилини билади, рус тилида гаплашади. Агар биз Германия методикасини тўлиқ ўзлаштириб олсак, йиллар ўтиб олий лигамизда бизнинг мактабдан чиқадиган кўп футболчиларни кўришимиз мумкин бўлади. Худо хоҳласа ишимизни самарасини яқин 6 йилда кўрамиз. Бу борада Тошкент шаҳар футбол федерацияси Вице-президенти Маъмур Юсуповга бизга катта ёрдам бераяптилар. Бунинг учун уларга раҳмат айтамиз.