"Сити"нинг икки ўйинчиси беш йилдан сўнг илк бор "шаҳарликлар" сафида Англия чемпиони бўлолмайди

Чемпионат тугашига олти тур қолганида "шаҳарликлар"нинг 55 очкоси бор ва "Сити" қолган ўйинларда энг кўпи билан 73 очко тўплаши мумкин. Пешқадам "Ливерпул"да эса аллақачон 76 очко мавжуд.

"Сити" охирги марта 2020 йил Англия чемпиони бўлмаганди. Ўшандан бери "шаҳарликлар" АПЛда кетма-кет тўрт марта ғалаба қозониб, рекорд ўрнатди.

Бундан ташқари, жорий мавсум "Сити" марказий ҳимоячиси Рубен Диаш учун Англияда чемпионлик унвонисиз якунланадиган биринчи мавсум бўлади. Рубен Диаш "Манчестер Сити"га 2020 йил кузида келганди.

Худди шундай ҳолат "шаҳарликлар"нинг бошқа ҳимоячиси Натан Аке билан ҳам кузатилмоқда, у ҳам 2020 йилда "Сити"га ўтганди.

2021 йилдан кейин "Сити"га қўшилган бошқа футболчилар ҳам "шаҳарликлар" сафида тўрт ёки ундан кам мавсум ўтказиб, биринчи марта Англия Премьер-лигаси чемпионлик унвонисиз мавсумни якунлайди. Улар орасида Жек Грилиш, Мануэль Аканжи, Эрлинг Ҳоланд, Штефан Ортега ва сўнгги икки йил ичида клубга келган янги футболчилар бор.