Самвел Бабаян: "Бугунги баҳсда 60 фоиз ўз даражамизни кўрсатдик"

- Ўйин ҳақида фикрингиз?

- Биринчи навбатда барча андижонликларни янги мавсум ва ғалаба билан табриклайман. Йирик ҳисобда ғалаба қозонган бўлсак-да, бунга эришиш осон бўлмади. Ўзига яраша қийин учрашув ўтказдик. Деярли 99 фоиз янги таркибга эгамиз. Шу боис ҳамманинг бирданига ўйинга қовушиб кетиши осон бўлмади.

"Сўғдиёна" биз кутган ўйинни намойиш этди. Рақибни ўрганиб чиққандик ва қандай ўйин намойиш этишини билардик. Бугунги баҳсда 60 фоиз ўз даражамизни кўрсатдик. Ҳали қилинадиган ишлар кўп. Айтиб ўтганимдек, таркиб тубдан ўзгарган. Ўйиндан ўйинга кучайиб борамиз деб ўйлайман.

Бугунги учрашувда 70 фоиз устунлик жамоамиз томонида бўлди. Ҳимоя ва ҳужумда яхши ҳаракат қилдик. Стадиондаги муҳит умуман алоҳида мавзу. Ҳамма шундай трибуналар қаршида тўп тепишни хоҳлайди. Мухлислар охиригача қўллаб туришди, уларга ҳам катта раҳмат. Биринчи қадам муҳим эди, хайрият ижобий якунлаб олдик.

Биз ўйинларни уй-меҳмонга ажратмаймиз, ҳар бир баҳсга жиддий ҳозирлик кўрамиз. "Андижон" клубига келишимдан мақсад - клуб тарихига оз бўлса-да ўз ҳиссамни қўшиш, вилоят раҳбарияти ва ишқибозларни хурсанд қилиш. Қанчалик қийин бўлмасин, ҳар доим ҳар бир ўйинни мухлисларга байрам сифатида улашишга ҳаракат қиламиз.

- Легионерлар жамоага қанчалик мослашяпти?

- Легионерлар яхши сифатга эга бўлиши ҳамда чиройли ўйин кўрсатиши лозим деб ўйлайман. Улардаги масъулият катта. Биз селекция ишларини чуқур ўйлаб олиб бордик, хусусан хорижлик футболчиларни пухта ўрганиб шундан сўнг жамоага таклиф этдик. Уларнинг инсонийлик хусусиятлари ҳам муҳим. Бугун легионерлар яхши ўйин кўрсатди, аммо майдондаги футболчиларни легионер ва маҳаллийга ажратмаган бўлардим. Чунки биз битта жамоамиз. Мақсадимиз ҳар бир ўйинда ўзимизни кўрсатиш.

- Азиз Турғунбоев ўйин қайдномасидан ўрин олмади.

- Чунки у жароҳат билан келганди ва ҳозир даволаняпти. Ўйлайманки, кейинги ўйинга Азиз тайёр бўлади.