Расмий хабар: "Металлург" - "Навбаҳор" учрашуви 4 март куни соат 15:30да бошланади

Янгиланаётган чемпионатимиз – СУПЕРЛИГА баҳслари 1 март санасидан эътиборан старт олади. У мамлакатимизнинг барча хонадонларига қувонч, хурсандчилик олиб киришини истаймиз.

Футбол байрами металлурглар шаҳри – Бекободда ҳам катта умидлар, улкан орзулар билан қаршиланаяпти. Мамлакатимиз индустрия саноатида муҳим ўрин тутувчи, меҳнаткаш, заҳматкаш, фидойи ишчилари, кўп миллатли аҳолиси билан ном қозонган Бекободда мавсум 2018 йилнинг 4 март санасида бошланадиган бўлди. Янги мавсум йўлида катта бунёдкорлик ишлари бажарилган “Металлург” марказий стадионида фақат битта камчилик қолди. “Тошшаҳарнур” томонидан амалга оширилаётган стадионнинг ёритиш тизимини талаблар асосида таъмирлаш жараёни бироз кечикяпти.

Ўзбекистон металлургия комбинати ҳиссадорлик жамияти, Бекобод шаҳар ҳокимлигининг илтимосини ерда қолдирмай, 1-тур учрашувини истисно тариқасида 4 март санасида, соат 15:30 да бошланишига рухсат берган, Бекободни катта футбол ҳавосидан бебаҳра қолдирмаганлиги учун кўп минг сонли футбол мухлислари номидан Ўзбекистон футбол ассоциациясига, Профессионал футбол лигаси мутасаддиларига миннатдорлик билдирамиз, - дейилади "Металлург" клуби матбуот хизмати хабарида. 

Бекободда бўлиб ўтадиган “Металлург” – “Навбаҳор” учрашувини мамлакатимизнинг таниқли ҳакамларидан, ФИФА рефериси Виктор Серазетдинов бошқариб боради. Унга қанотларда Тимур Гайнулин ва Андрей Цапенколар ёрдам беришади.  Заҳирадаги ҳакам Рустам Лутфулин. Ҳакамлар гуруҳи фаолиятини эса Бахтиёр Тоғаев назорат этиб боради.

4 март (якшанба)

“Металлург” (Бекобод) – “Навбаҳор” (Наманган), Бекобод. “Металлург” стадиони. 4.03.2018 йил, 15:30
Ҳакамлар: В.Серазитдинов (Тошкент), Т.Гайнуллин (Тошкент), А.Цапенко (Тошкент вил.), Р.Лутфулин (Тошкент).
Назоратчи: Б.Тоғаев (Тошкент).