"Рақобатчиларимизнинг ҳаракатларини назорат қилиш имконсиз. Ўз ўйинимизга эътибор қаратишимиз керак" — Артета

Кеча Лондон клуби АПЛнинг 17-туридан ўрин олган учрашувда "Вест Хэм" устидан иродали ғалабага эришди (3:1).

Эндиликда "канонирлар" Англия чемпионати 15 ўйинидан сўнг 40 очкога эга. "Ньюкасл" 16 ўйинда 33 очко жамғариб, иккинчи ўринда бормоқда. "Манчестер Сити" 14 баҳсдан кейин 32 очко билан учинчи ўринда кетяпти.

"Футболчиларга ўзларига эътибор қаратишларини айтаман. Рақобатчиларимизнинг ҳаракатларини назорат қилиш имконсиз. Улар қанчалик яхши бўлишини, қанча очко олишларини ёки йўқотишларини билмаймиз. Биз ўз ўйинимизга, ҳар куни қилаётган ишимизга эътибор қаратишимиз керак.

Бу тасодиф эмас, шунинг учун аввалгидек ишлашда давом этиш лозим.

Биз қийин пайтда чақириққа муносиб жавоб бера олдик. Бизда жуда кўп жароҳатланганлар бор – Жезус, Смит-Роу ва Томиясу йўқ эди. Шунга қарамай, жамоа ўзига ишонди ва яна ғалаба қозонди", – деди "Арсенал" бош мураббийи.