"Қурувчи" (кейинчалик "Бунёдкор") лойиҳасига сарфланган миллионлар ўзини оқладими?

Аброр ака "Бунёдкор" лойиҳасига тикилган миллионларнинг ўзини оқлаб, оқламагани тўғрисидаги саволга шундай жавоб қайтарди:

"Йўқ, маблағ жиҳатидан оқламаган бўлиши мумкин. Лекин, футболнинг ривожи учун катта ҳисса қўшди. Сабаби шундаки, ўзбек футболида 2002 йилдан кейин "Пахтакор"нинг монополияси вужудга келган, "шерлар"га ҳеч ким яқинлаша олмас эди. "Қурувчи" (кейинчалик "Бунёдкор") клуби эса бу ҳолатга чек қўйиб, ички чемпионатда жуда кучли рақобат пайдо қилди.

Иккинчидан, профессионал клуб иш тизимини йўлга қўйиб, бошқаларга ўрнак бўлди. Клуб қандай бўлиши керак, қанақа бўлимлар ишлаши керак қабилидаги саволларга жавоб топиб берди. Маркетинг, менежмент ва матбуот хизматларининг қай тариқа ишлаши кераклигини бошқаларга кўрсатиб қўйди.

Ва энг муҳими, хориждан катта номларнинг олиб келиниши ўз футболи учун ўзига хос "бум" бўлди. Ривалдо, Зико ва Сколари сингари афсоналарни мухлислар ўз кўзлари билан кўришди. Бу томонлама ижобий ҳислатлар кўп. Аммо, юқорида айтганимдек, маблағ жиҳатидан ўзини ҳеч қачон оқламаган".

Маълумот учун, А. Имомхўжаев "қалдирғочлар" тизимида 2007-2020 йилларда (маълум танаффуслар билан) фаолият юритиб, матбуот котиблигидан бош директор ўринбосари лавозимигача кўтарилишни уддалаган.