Пулписнинг Ўзбекистондаги учинчи саргузашти. Вазифа ўзгармаган, лекин бу сафар авлод бошқа

 Испаниялик мутахассис Хосе Мария Мендес, яъни мухлислар яхши танидиган Пулпис, миллий жамоадаги фаолиятини учинчи марта бошлади. Бир қарашда бу оддий тайинловдек туюлиши мумкин. Аммо вазиятга чуқурроқ назар ташласак, бу галги миссия аввалгиларидан анча фарқ қилади.

Биринчи иш — танишув

Бу босқични "танишув" деб аташ бежиз эмас. Чунки Пулпис иккинчи маротаба келган ва мундиалга олиб чиққан йилда Ўзбекистон футзали муҳитига анча мослашган ҳолда иш бошлаган эди.

2012 йилги муваффақиятсизликдан сўнг келган навбатдаги циклда ҳам терма жамоа таркиби кескин ўзгариб кетмаганди. Жамоанинг асосий ўзаги сақланиб қолган, кўплаб ижрочилар Пулписга яхши таниш эди. У футболчиларнинг имкониятларини, характерини ва майдондаги имкониятларини яхши биларди. Бу эса мураббий учун муайян даражада енгиллик яратган.

Албатта, Пулпис ўзбек менталитети, футзалчиларнинг руҳияти ва маҳаллий футзалнинг ўзига хос жиҳатларини яхши билади. Бироқ бугунги кундаги авлод билан вазият анча бошқача. Ҳозирги таркибда испаниялик мутахассис учун деярли янги бўлган футзалчилар кўпчиликни ташкил қилади.

Номлар миқёсида қарайдиган бўлсак, Пулпис билан аввал ишлаган футзалчилар сони жуда кам. Унинг қўл остида Ўзбекистон U-20 терма жамоасида тўп тепган Акбар Усмонов, Ҳусниддин Нишонов ва Илҳом Ҳамроев каби ўйинчиларнигина мисол келтириш мумкин. Қолганлар учун эса бу мураббий ҳам, қарашлари ҳам янги.

Шу боис Пулпис учун биринчи вазифа — жамоани тезроқ ўрганиш, янги авлод билан ишлаш ва уларнинг потенциалини тўғри баҳолаб, максимал натижа кўрсатишдан иборат бўлади.

Учинчи саргузашт бошланди

Испаниялик мутахассиснинг Ўзбекистон футзали билан боғлиқ тарихи анча бой.

Пулпис илк бор 2011 йилда Ўзбекистон футзал терма жамоаси бош мураббийи сифатида иш бошлаган. Унинг олдига жуда муҳим вазифа — жамоани 2012 йилги Жаҳон чемпионатига олиб чиқиш талаби қўйилган эди. Бироқ БАА мезбонлик қилган Осиё чемпионатида вакилларимиз чорак финалда Эронга 3:6 ҳисобида мағлуб бўлиб, мундиал йўлланмасидан қуруқ қолган.

Шундан кейин бир неча йил ўтиб, 2015 йилда Пулписга яна бир имконият берилди. Бу сафар вазият анча бошқача эди. Осиё чемпионати Тошкентда бўлиб ўтди ва миллий жамоа ўз мухлислари олдида тарихий натижага эришди. Терма жамоамиз ўз тарихида илк бор футзал бўйича Жаҳон чемпионати йўлланмасини қўлга киритди. Бу натижа Мендес номини ўзбек футзали тарихи билан узвий боғлаб қўйди.

Шунингдек, у фақат миллий жамоа билан эмас, ёшлар билан ишлашда ҳам маълум натижаларга эришган. 2017 йилда Ўзбекистон U-20 терма жамоаси унинг қўл остида Осиё чемпионатида тўртинчи ўринни эгаллаган. Бу натижа ҳам келажак авлод учун муҳим тажриба бўлган, кўплаб янги номларни кашф қилган.

Клуб даражасида эса у маълум муддат "Ардус" жамоасида фаолият юритган.

Буларнинг барчаси Пулписнинг Ўзбекистон футзалидаги изи анча чуқур эканини кўрсатади. 

Олдиндаги асосий вазифа — Жаҳон чемпионати йўлланмаси

Кейинги, 2028 йилда ўтказиладиган Осиё чемпионати Жаҳон чемпионатига йўлланма учун муҳим саралаш босқичи вазифасини ўтайди. Демак, терма жамоа олдида турган энг асосий мақсад — айнан шу мусобақа орқали мундиалга чиқиш имкониятини қўлга киритиш.

Бу борада бош мураббий Пулпис олдида жуда масъулиятли давр бошланмоқда. Шу нуқтаи назардан қараганда, мутахассис билан имзоланган икки йиллик шартнома мутлақо мантиқий қарор сифатида баҳоланиши мумкин.

Испаниялик мутахассис бу вазифани аввал ҳам уддалаган, яъни жамоани муҳим турнирлар орқали катта мусобақаларга олиб чиқиш тажрибасига эга. Энди эса у янги авлод футболчилари билан ишлаб, яна бир бор шу йўлни босиб ўтишга ҳаракат қилиб кўради.

Янги авлод – янги синов

Пулпис учун бу галги вазифа аввалгиларидан кўра мураккаброқ бўлиши мумкин. Чунки у эндиликда таниш жамоа эмас, балки деярли янги авлод билан ишлашга тўғри келади. 

Бу эса мураббийдан нафақат тактик билим, балки тўғри селекция, психологик ёндашув ва жамоани босқичма-босқич шакллантиришни талаб қилади. Пулпис Ўзбекистон футзалида аллақачон ўз номини қолдирган. Аммо учинчи саргузашт унинг бу ердаги энг муҳим ва энг синовли босқичига айланиши мумкин. Бу аввалгиларидан буткул фарқ қилади.