ЎзФҲМ йиғилиши: икки ўйинда қизил карточка кўрсатилиши керак эди

Унда Ўзбекистон футбол ассоциацияси биринчи вице–президенти Равшан Ирматов иштирок этиб, ҳакамлар фаолияти юзасидан ўз фикр ва тавсияларини билдирди. Шунингдек, мазкур тур учрашувлари бўйича таҳлиллар Фарҳод Абдуллаев, Валентин Коваленко, Бобур Ҳайдаров ва Жаҳонгир Саидовлар томонидан олиб борилди.

Йиғилиш давомида Равшан Ирматов қуйидаги муҳим жиҳатларга тўхталиб ўтди:

Қоидалар талқини: "Футбол қоидалари аллақачон ишлаб чиқилган. Уни ўзгартириш ёки қўшимча талқин қилиш тўғри эмас. Агар кимдир қоидаларни ўзича талқин қилмоқчи бўлса, маҳалла футболини бошқарсин. Суперлига ҳаками ҳар бир вазиятни аниқ мезонлар асосида баҳолаши лозим";

Қарор қабул қилиш: Қарорлар ўйиннинг сўнгги дақиқалари ёки мухлислар реакциясидан келиб чиқиб эмас, балки ўйин қоидаларига таянган ҳолда қабул қилиниши шарт;

Тизимли ёндашув: Суперлига, Пролига ва Биринчи лига учрашувларида барча ҳакамлар бир хил ёндашув асосида ишлаши керак. Ҳеч бир ҳакам ўзбошимчалик билан қарор чиқарадиган тизим бўлмаслиги лозим;

Интизом ва экипировка: Клублар ва футболчилар белгиланган экипировка тартибига амал қилиши шарт. Қоидани бузганлар, ким бўлишидан қатъи назар, жазоланади.

Йиғилишда айрим учрашувлардаги баҳсли вазиятлар мисол тариқасида кўриб чиқилди:

"Сурхон" – "Бунёдкор": VAR орқали гол бекор қилинган эпизод юзасидан фикр алмашилди.

"Динамо" – "Насаф": "Динамо" футболчисига нисбатан қизил карточка кўрсатилмаган вазият таҳлил қилинди. Ушбу ҳолатда ҳакам Достон Раҳмоновга аниқ қизил карточка кўрсатилиши кераклиги бўйича кўрсатма берилди.

"Машъал" – "Қизилқум": VAR орқали эпизод қайта кўрилганидан сўнг, бош ҳакам Ғайрат Жўраев томонидан қизил карточка кўрсатилиши лозимлиги қайд этилди.

Якунда ҳакамлар фаолияти мунтазам равишда кузатиб борилиши, кейинги тайинловлар эса бевосита майдондаги иш сифатига қараб амалга оширилиши таъкидланди.