Ўзбекистон U-23 терма жамоаси аъзоси жароҳат сабаб операция столига ётади
11 июн 2022 12:07
Янгиликлар

Ўзбекистон U-23 терма жамоаси аъзоси жароҳат сабаб операция столига ётади

Айни пайтда Ўзбекистонда U-23 Осиё кубоги мусобақаси давом этмоқда.

Тимур Кападзе бошчилигидаги Ўзбекистон терма жамоаси бугун чорак финалда Ироққа қарши майдонга тушади.

U-23 Осиё Кубоги. Бугун Ўзбекистон ироқликларга қарши баҳс олиб боради ва чорак финалдан ўрин олган яна бири ўйин ўтказилади

Афсуски, "Металлург" клуби ва ушбу терма жамоа ярим ҳимоячиси Иброҳим Ибрагимов учун мусобақа тугади. Гап шундаки, Эронга қарши баҳсдан олдинги машғулотда Ибрагимов ўнг оёқ тизза қисмидан жароҳат олди. Биз вазият билан тўлиқ танишиш учун терма жамоа шифокори Алишер Абдураҳмоновга мурожаат қилдик.

"Машғулотда Иброҳим Ибрагимов жароҳат олди. Шундан кейин Тошкент шаҳридаги клиникалардан бирида текширувдан ўтказилгач, футболчининг ўнг оёқ олд қисми латериаль мениск йиртилгани (узилган) аниқланди. Ушбу жароҳатни фақат жарроҳлик йўли билан даволаш мумкин. Шу сабабли Иброҳим Ибрагимов душанба куни операция столига ётади. Жарроҳлик амалиёти Тошкент шаҳридаги Травматология ва ортопедия институти спорт жароҳати бўлимида ўтказилади. Бундай жароҳатдан кейин футболчилар одатда икки ҳафта тикланиш жараёнини бошдан кечиришади ва кейин енгил машғулотларни бошлашади. Ибрагимов операциядан кейин тахминан бир ойда тўлиқ тузалиб майдонга қайтиши мумкин.

Иброҳим Ибрагимов ва терма жамоадаги барча футболчилар соғлиги ЎФА тиббий қўмита аъзолари назоратида", - деди биз билан суҳбатда Ўзбекистон U-23 терма жамоаси шифокори Алишер Абдураҳмонов.