Ўзбекистон чемпионати ва кубогида ғалаба қозонган биринчи хорижлик мутахассис оламдан ўтди

Ўтган аср охирида "Навбаҳор" ва "Дўстлик" клубларидаги фаолияти билан юртимиз футболи ишқибозларига яқиндан таниш бўлган мутахассис 83 ёшида оламдан ўтди.

Бу ҳақида таниқли футбол мутахассиси Алишер Никимбаев ўзининг телеграмдаги каналида шундай ёзади:

"Бугун Леонид Остроушко вафот этди. Ҳам Ўзбекистон чемпионати, ҳам мамлакат кубогида ғалаба қозонган биринчи хорижлик мураббий. У Ўзбекистон терма жамоаси мураббийи сифатида ўтказган ягона ўйинида Бора Милутинович бошқаруви остидаги Хитой терма жамоасини мағлубиятга учратганди. 

Албатта, Леонид Константинович тарихда энг аввало СССР чемпионатининг асосий лигасида 200 та учрашув ўтказган "Қайрат" клуби футболчиси сифатида қолади.

Леонид Остроушко 83 ёшда эди. У узоқ ва шарафли ҳаёт кечирди. Бугун эса у орамизда йўқ. Ундан ёрқин хотира қолди...".

Ушбу фикрларга қўшимча қилишимиз мумкинки, Леонид Константинович Остроушко 1936 йилнинг 10 августида Украинада таваллуд топганди. Футболчилик фаолияти Киевнинг "Динамо"си ва Қозоғистоннинг "Қайрат" клуби сафида ўтган. Қозоғистон, Россия ва Ўзбекистонда хизмат кўрсатган мураббий, спорт устаси. Марҳум мутахассиснинг сўнгги клуби Минскнинг "Динамо" клуби бўлганди.