Осиё Кубоги-2019. Умид Аҳмаджоновнинг қуръадан кейинги фикрлари

Ушбу тадбирда ЎФА вице-президенти Умид Аҳмаджонов ҳам иштирок этди. Қуръа натижаларига кўра, Ўзбекистон "F" гуруҳида Япония, Уммон ва Туркманистон билан жой олди. Қуръадан сўнг биз яна бир бор Умид Аҳмаджоновни суҳбатга тортдик.

- "Қуръани ҳаммамиз катта қизиқиш билан кузатиб бордик, - Умид Маҳамаджонович. - Тадбир юқори савияда ўтди, ташкилий томонлари ҳам жойида бўлди. Энди биз жой олган гуруҳга келадиган бўлсак, яхши гуруҳдан жой олдик. Ўйлайманки, бу гуруҳдан бемалол биринчи ўрин билан чиқамиз".

- "Рақиблар ҳақида нима дейишим мумкин? Япония - кучли, лекин улар билан ўйнаса бўлади. Биз ҳар қандай мусобақага ижобий натижа учун борамиз. Осиё ўйинлари бўладими ёки Осиё Кубогими фарқи йўқ, мақсад битта: халқимизни хурсанд қиладиган натижага эришиш. Албатта, энг катта мақсадимиз бу - 2022 йилги Жаҳон чемпионатига чиқиш".

- "Уммон ва Туркманистон ҳақида гапирадиган бўлсам, бу жамоалар ҳам яхши, лекин биз улардан кучлимиз. Қуръадан олдин ҳам айтгандим, биз кучли гуруҳга тушишни хоҳлаймиз деб. Нима учун? Чунки терма жамоани фақат кучли жамоаларга қарши ўйинларгина ўстиради. Биз бекорга Жаҳон чемпионатига чиққан терма жамоаларга қарши ўртоқлик учрашувлари ташкил қилаётганимиз йўқ. Бундан кўзланган мақсад, секин-аста уларнинг даражасига чиқиш".

- "Ўзбекистон U-23 терма жамоаси Хитойда бўлиб ўтган Осиё чемпионатида чемпион бўлганидан кейин ўзингиз кўрдингиз, мухлислар қанча хурсанд бўлди. Халқимиз асосий терма жамоамиздан ҳам мана шундай ютуқни соғиниб қолган ва ўйлайманки, Осиё Кубоги-2019 насиб қилса Ўзбекистон учун аталган бўлади".

Х.Холиқов, Дубайдан махсус.